Staat speel vuil oor steenkoolmyn

’N SENIOR amptenaar van die Departement van Landbou, Bosbou en Visserye is deur ANC-LP’s oor die vingers getik oor haar standpunt dat boere kapitaalbesteding op infrastruktuur terughou weens beleidonsekerheid, veral rakende onteiening sonder vergoeding.

Me. Ellen Matsei, direkteur vir ekonomiese ontleding en statistieke by die departement, het die landbousakekamer Agbiz se sakevertroue-indeks vir die derde kwartaal vanjaar in haar ontleding van die produktiwiteit van die landbousektor aan die Parlement se portefeuljekomitee vir landbou, bosbou en visserye voorgehou.

Sy het gesê die departement het bewus geword van die gevoel dat beleidonsekerheid min ruimte bied aan boere om werk te skep. Die meeste boere koop nie toerusting aan nie, brei nie hul bedrywighede uit nie en bestee niks aan infrastruktuur nie, omdat onteiening sonder vergoeding ’n ernstige kwessie is wat nog in die lug hang.

Die land se stadige ekonomiese groeikoers beïnvloed ook boere se beleggingsvermoë.

Me. Mamonare Chueu, ANCLP, het gesê die kwessie rakende onteiening sonder vergoeding het nie in 1994 bestaan nie, maar tog was landboubesighede se winsgewendheid toe ook laag.

Me. Machwene Semenya, voorsitter van die portefeuljekomitee, het gesê dit kan nie waar wees dat die kwessie van onteiening sonder vergoeding bygedra het tot ’n swak bruto binnelandse produk vir die sektor nie, want dit is eers betreklik onlangs afgekondig.

“Ek het nog nie ’n boer ontmoet wat aangedui het hy gaan nie plant nie weens die voorstel van onteiening sonder vergoeding.”