Lewenspolisse en begunstigdes
Daar is verskillende voor- en nadele daaraan verbonde om begunstigdes vir lewenspolisse te benoem. Boere behoort hiervan kennis te neem.
Baie boere het lewenspolisse op hul eie lewe of op dié van hul gades uitgeneem, maar weet nie altyd wat die impak van benoemings van begunstigdes op die polisse is nie. In dié artikel word die belangrikste gevolge van die benoemings van begunstigdes op lewenspolisse uitgewys.
VOORDELE
Die tersaaklikste voordele van die benoeming van begunstigdes van polisse is: Die polisopbrengs betaal regstreeks aan die begunstigde. Die voordeel hiervan is die begunstigde hoef nie te wag dat die boedel eers afgehandel word nie en het dus toegang tot die polisopbrengs sodra dit uitbetaal het.
Die polisopbrengs betaal buite die boedelberedderingsproses uit aan die begunstigde. Daar is dus ’n besparing op die eksekuteurstarief (’n maksimum toelaatbare tarief van 3,5% + BTW = 4,03% op die bruto waarde van die polis) omdat die polis begunstig word.
Dit is belangrik om daarop te let dat die benoemings van begunstigdes nie noodwendig ook ’n besparing op boedelbelasting meebring nie. ’n Besparing op eksekuteurstariewe vind dus plaas, maar nie op boedelbelasting nie.
Indien die begunstigde egter jou gade is, sal jy ook in aanmerking kom vir ’n aftrekking ten opsigte van die polisopbrengs wat aan jou gade begunstig is (art. 4 [q] van die Boedelbelastingwet, Wet 45 van 1955). Die opbrengs van lewenspolis betaal aan ’n begunstigde in geval van insolvensie. Indien ’n begunstigde vir ’n lewenspolis benoem word, word die opbrengs van die lewenspolis in geval van insolvensie van die oorledene (en lewensversekerde) regstreeks aan die begunstigde betaal. Die opbrengs is dus nie deel van die insolvente boedel nie.
Krediteure sal nie daarop beslag kan lê nie. Die Shrosbeesaak wat in die Appèlhof gaan draai het, is hier van belang. Ná dié saak is daar nie meer ’n beperking op die lewenspolis wat aan ’n spesifieke begunstigde betaal nie, maar die volle opbrengs van die polis sal aan die begunstigde betaal word, selfs al is die oorledene insolvent.
NADELE
Daar is twee moontlike nadele vir die benoemings van begunstigdes van lewenspolisse waarvan boere kennis behoort te neem. Die polisopbrengs is nie outomaties beskerm teen begunstigdes se huweliksgoederebedelings nie. Testamente bevat gewoonlik ’n standaardklousule dat die erfenis van jou erfgename beskerm word teen die huweliksgoederebedeling waarvolgens hulle getroud is. Indien ’n begunstigde egter in ’n lewenspolis benoem word, is die opbrengs van daardie polis nie outomaties beskerm teen die begunstigde se huweliksgoederebedeling nie. Die aanbeveling is dus om deeglik kennis te dra van jou kind/erfgenaam se huweliksgoederebedeling voor jy hom/haar as polisbegunstigde benoem omdat die polisopbrengs nie outomaties beskerm word nie. Waak daarteen om minderjarige kinders of kleinkinders as begunstigdes van lewenspolisse te benoem. Indien minderjariges as begunstigdes benoem word, sal die polisopbrengs aan die minderjarige in sy/haar bankrekening uitbetaal, maar die minderjarige se voog sal beheer oor die bankrekening hê. Waak veral daarteen waar die voog van die minderjarige, byvoorbeeld, onkundig is met geld, of die geld vir eie gewin sal gebruik.
Oorweeg dalk eerder om die polis aan die boedel betaalbaar te maak (met ander woorde om geen begunstigde te benoem nie) en die polisopbrengs in die testament aan ’n testamentêre trust te bemaak waarin trustees die geld kan belê tot voordeel van die minderjarige kind. Dit is veiliger en beskerm die kind se belange in sodanige gevalle.
GEVOLGTREKKING
Die spreekwoord lui “skoenmaker hou jou by jou lees”. Indien jy besluite moet neem met betrekking tot die benoemings van begunstigdes van polisse kan ’n kundige se advies om eers die impak te verstaan voor jy tot aksie oorgaan van onskatbare waarde wees. ’n Kundige finansiële raadgewer kan jou help om ’n ingeligte besluit te neem met betrekking tot die benoeming van begunstigdes al dan nie, hetsy van bestaande of nuwe lewenspolisse.