Migdol samel amper R1miljoeninvir droogteslagoffers
DROOGTE is steeds ’n aaklige werklikheid vir verskeie distrikte in die land, en daarom sal hy steeds voortgaan om te help.
Só sê mnr. Burre Burger, die boer van Vredendal wat sedert Maart verlede jaar reeds 909 vragte voer, mielies en ander droogtehulp tot in die verste uithoeke van die land afgelaai het.
Hy het sy dank uitgespreek teenoor die klein boeregemeenskap van Migdol in Noordwes wat hul harte en hande oopgemaak het en net minder as R1 miljoen met ’n droogtehulpfees ingesamel het.
Die fees, by Suidwes Landbou se silo’s op dié dorp, is ondanks gure weer deur meer as 1 200 mense bygewoon.
Mnr. Retief Riekert, ’n boer van Migdol en lid van die plaaslike boerevereniging, was die stille krag agter dié fees.
“Dit is net een oggend toe ek opstaan op my hart gelê ek moet iets doen om daardie boere wat steeds swaarkry te help, en toe reël ons ’n fees,” vertel Riekert.
VEILING
Die fees het ook gespog met ’n veiling van diere wat geskenk is deur boere wat self vroeër in die nood was.
Die afslaers André Kock en Seuns het die veiling behartig. Die veiling het R200 000 ingebring.
Boere van Williston, waar daar steeds dele is wat baie droog is, het onder meer 100 skape vir die veiling geskenk om dankie te sê vir hulp wat hulle ontvang het toe die nood op sy hoogste was.
Riekert sê verskeie kunstenaars wat opgetree het, het hul dienste gratis gelewer. Jagpakkette wat opgeveil is, het goeie aftrek gekry.
Volgens mnr. Deon Badenhorst, bestuurder van koöperatiewe bemarking en kommunikasie by Suidwes Landbou, wat die terrein vir die fees beskikbaar gestel het, is dié maatskappy bewus van lede en gemeenskappe waar vee weens die droogte vrek. Hulp word veral dringend in die NoordKaap benodig.
“’n Gebied soos die Richtersveld se weiding is tot niet; dit het ses jaar laas behoorlik daar gereën,” het Burger bygevoeg.
Hy sê daar is ook groot nood op Aberdeen in die Oos-Kaap en Beaufort-Wes en Bitterfontein in die Wes-Kaap.
“Dit reën net kol-kol vanjaar, daar is dus steeds dringend hulp nodig,” sê hy.
Hy bereken die waarde van die vragte droogtehulp wat al aangery is op R65 miljoen.