WAS ROOIGRAS WES-KAAP SE OORSPRONKLIKE VELD?
Stephen Cousins en Amelia Genis se artikel oor die bewaring van renosterveld in die Wes-Kaap (“Renosterveld blom [ook] in die Swartland”, LBW, 5 Oktober 2018) het betrekking.
Ek ken renosterveld, asook die sogenoemde slangbos wat deel uitmaak van vandag se plante in die Wes-Kaap.
In die Vrystaat ken ek slangbos as “bankrotbossie” omdat dit oorneem in weiveld wat vernietig is, en waar die eienaar bankrot is. Die bankrotbossie is ’n pioniersgewas.
Ek het in die 1960’s klas geloop by prof. C.L. Wicht, destyds verbonde aan die fakulteit bosbou aan die Universiteit Stellenbosch.
Wicht was oortuig dat die huidige veld in die Wes-Kaap eintlik pioniersgewasse is wat oorgeneem het weens voortdurende veldbrande wat die vroegste bewoners van daardie gebied gestig het om wild aan te jaag en te jag. Vandaar slangbos en renosterbos. Hy was van mening dat die werklike oorspronklike veld in die Wes-Kaap rooigras
(Themeda) was. Dieselfde geld die Karoo se plantegroei.
Ek het in die 1970’s baie werk gedoen in die veld in verskillende dele van die Karoo. Die norm vir plantegroei was takkerige “karoobossies” met groot kaal kolle tussenin. Tot mnr. Gerrit Visser van die plaas Komkommerleegte, distrik Fraserburg, my eendag na sy plaas toe genooi het. Ek het op my rug geval om te sien dat sy plaas se veld bestaan het uit wuiwende rooigras met ’n verskeidenheid ander eetbare grasse tussenin. Hy het dit vermag deur bewaringsboerdery toe te pas. Hy het my verseker dat sy plaas se drakrag talle kere groter is as dié van sy bure.
Hierdie ervaring in die Karoo het my oortuig dat Wicht waarskynlik reg was oor die Kaap se huidige veldtipes. Die feit dat daardie veld aangepas is om te brand, dui daarop dat die veld dikwels gebrand het en dat die oorspronklike gras feitlik verdwyn het.
Nou wonder ek net: Word pioniersgewasse in die WesKaap nou bewaar sonder om die oorspronklike plantegroei terug te bring?
Ek vra maar net! FRANS HUGO Bela-Bela