TAAKSPAN HELP SA UIT UITVOERTAMELETJIE
VINNIGE optrede in die tyd nadat bek-en-klouseer verlede maand in die noorde van Limpopo gediagnoseer is, werp nou vrugte af. Verskeie van Suid-Afrika se handelsvennote het reeds handelsbeperkinge op verwerkte rooivleisprodukte opgehef.
’n Handelstaakspan, bestaande uit amptenare van die Departement van Landbou, Bosbou en Visserye en belanghebbendes in die rooivleisbedryf, is feitlik onmiddellik ná die uitbreking buite die bek-en-klouseervrye gebied tot stand gebring.
Die taakspan het hard daaraan gewerk om handelsvennote te oortuig om nie hul grense vir plaaslike rooivleis, melk, wol en verwante produkte te sluit nie.
“Suid-Afrika het wel sy status as ’n sone vry van bek-en-klouseer sonder inenting by die internasionale organisasie vir dieregesondheid (OIE) verloor, maar die departement en private sektor het onmiddellik die situasie met Suid-Afrika se handelsvennote bespreek. “Sodoende kon ons waarborge verskaf dat produkte wat nie bek-en-klouseer kan oordra nie, wel veilig is,” het mnr. Senzeni Zokwana, Minister van Landbou, Bosbou en Visserye, op ’n mediakonferensie in Pretoria gesê.
Dié produkte sluit in gepasteuriseerde melkprodukte, ontbeende en verouderde rooivleis, wol, verwerkte huide en velle, vee-embrio’s en varkvleisprodukte uit bek-en-klouseervrye gebiede.
TERUGVOER
Zokwana het gesê die departement het handelsvennote dadelik in kennis gestel die oomblik toe bek-en-klouseer buite die bek-en-klouseervrye gebied opgemerk is. Die departement verskaf deurentyd die jongste inligting oor die situasie aan Suid-Afrika se handelsvennote.
“Na aanleiding van hierdie verslae het verskeie handelsvennote handelsbeperkinge op die uitvoer van verwerkte produkte opgehef. Handel in veilige produkte na buurlande is grootliks aanvaar en, waar nodig, is die onderhandelinge begin om nuwe gesondheidsertifikate uit te reik.
“Ons het ook goeie vordering gemaak met onderhandelinge om markte in ander Afrikalande, asook die Verre- en Midde-Ooste, te heropen,” het hy gesê.
Zokwana het gesê die taakspan kon tot dusver goed daarin slaag om kommunikasie tussen die bedryf, provinsiale veeartse, die departement en handelsvennote te vergemaklik.
NAMIBIË
Intussen het die Namibiese departement van landbou, water en bosbou aangekondig dat hy weer sommige Suid-Afrikaanse produkte sal invoer.
Dr. Albertina Shilongo, waarnemende hoofveearts van Namibië, sê in ’n verklaring aan invoerders die Namibiese direktoraat van veeartsenykundige dienste sal weer die invoer van vars en bevrore varkvleisprodukte toelaat, mits bewys kan word dat die produkte van varkboere buite Limpopo, Mpumalanga en KwaZulu-Natal afkomstig is.
Die produsente moet ook deur die Suid-Afrikaanse Departement van Landbou, Bosbou en Visserye goedgekeur wees.
Vleis van vee wat voor 5 Desember geslag is en wat onder toesig van die Suid-Afrikaanse Departement van Landbou, Bosbou en Visserye afsonderlik opgeberg is om besmetting te voorkom, mag ook ingevoer word.
Bale voer en kuilvoer mag ingevoer word, mits dit nie van Limpopo, Mpumalanga of KwaZulu-Natal afkomstig is nie.