GEEN NUWE RAMPGEBIEDE VIR DROOGTE VERKLAAR

DIE Regering het tans meer as R3,7 miljard beskikbaar om as droogtehulp aan te wend. Dié geld bestaan uit R3,2 miljard wat die Tesourie in Oktober verlede jaar beskikbaar gestel het, asook R566,5 miljoen wat deur die Departement van Landbou, Bosbou en Visserye toegestaan is om aan die landbousektor beskikbaar te stel.

Mnr. Senzeni Zokwana, Minister van Landbou, Bosbou en Visserye, sê hierdie hulp word

tans in verskeie provinsies aangewend. Ingevolge die Wet op Rampbestuur (Wet 16 van 2015) is dit meestal gemik op boere wat nie self die mas kan opkom nie.

Zokwana het ook aangedui dat hy ’n droogteverslag van die Landboubemarkingsraad ontvang het wat aanbeveel dat ’n droogterampfonds en multirisiko-versekeringsdekking vir die landbou ingestel word, asook ’n

vroeë waarskuwingstelsel om ramprisiko’s te verminder.

Nadat Landbouweekblad vroeër berig het dat verskeie munisipaliteite in die Noord-Kaap, Noordwes en Vrystaat voorbereidings begin tref het om aansoek te doen om rampstatus, het die Departement van Samewerkende Regering en Tradisionele Sake egter aangedui geen munisipaliteite of provinsies het tot dusver

aansoek gedoen nie.

Mnr. Musa Zondi, woordvoerder van die departement, sê hoewel verlede jaar se nasionale rampdroogteverklaring reeds deur dr. Zweli Mkhize, Minister van Samewerkende Regering en Tradisionele Sake, opgehef is, is die verklaring van sekere gebiede in die land tot rampgebiede weens droogte steeds van krag.