Oos-Kaapse boorgate begin opdroog
BOORGATE in verskeie dele van die Oos-Kaap sukkel tans om genoeg water te lewer, of droog op weens die ernstige droogtetoestande in die provinsie.
Volgens mnr. James Briggs van Irrico-besproeiingsdienste het verskeie boorgate by Graaff-Reinet, Cradock, Bedford, Adelaide, Tarkastad, Pearston en elders in die provinsie reeds opgedroog.
“Daar was geen reën hierdie somer nie. As dit nie teen Maart reën nie, gaan daar ’n katastrofe wees. Die probleem is ook water vir vee, want baie boere gebruik boorgate om vir hul vee water te gee.”
Luidens ’n verklaring sê Agri Oos-Kaap dat boorgatvlakke daagliks sak en dat oppervlakwater amper heeltemal opgedroog is, wat tot groot probleme met waterverskaffing vir vee kan lei.
“In die huidige droogte is dit ’n baie ernstige situasie,” sê me. Riona Kruger, ’n prinsipaal-geoloog van SRK Consultanting South Africa, wat onder meer konsultasiedienste vir waterhulpbronne verskaf.
“Ons almal is bewus van dalende dam- en riviervlakke, maar omdat grondwater ‘onsigbaar’ is, word daar nie so ernstig daarna gekyk nie en word die watervlakke nie oral gemonitor nie.”