KLK-AANDEELHOUERS SKOP TEEN SUBTROPICO-AANBOD

DIE stryd verdiep tussen twee landboureuse wat stoei om beheer van KLK Landbou. Senwes én Subtropico het einde verlede jaar aanbiedings vir KLK gemaak. Dié maatskappy, met sy hoofkantoor in Upington, het ’n omset van sowat R2,2 miljard per jaar.

In die jongste ontwikkeling het KLK se onafhanklike direksie in ’n omsendbrief aan aandeelhouers gesê hy is eenparig van mening dat Subtropico se aanbod nie “billik of redelik” is nie. Hy sê in sy omsendskrywe dat ’n onafhanklike kundige ’n waardasie van die KLK- en Subtropico-aandele uitgevoer het. Daarin is bevind Subtropico se kontantaanbod is nie billik nie, aangesien die aanbodprys van R17,50 per aandeel “minder is as die waarde van R19 tot R23,50 wat ’n koper vir KLK-aandele behoort te betaal.”

BILLIK, NIE REDELIK

Subtropico besit reeds 30,6% van KLK se aandele.

As alternatief tot sy kontantaanbod bied Subtropico ook een Subtropico-aandeel aan vir elke ses KLK-aandele wat besit word. Hieroor sê KLK se direksie die aandele-aanbod is billik, maar nie redelik nie. Dit is weens die “kwalifiserende aandeelhouers se gebrek aan verteenwoordiging op die Subtropico-direksie in die lig van sekere bepalende besluite wat deur Subtropico geneem moet word onmiddellik nadat die aanbod deurgevoer is”.

Die direksie maak ook beswaar dat Subtropico sekere regulatoriese vereistes nie nagekom het voor hy die aanbod gemaak het nie, soos om ’n prospektus by die Kommissie vir Maatskappye en Intellektuele Eiendom te registreer. Dit is ’n vereiste ingevolge die Maatskappyewet.

SENWES

Senwes se aanbod ter waarde van R318 miljoen is op 14 Desember gemaak.

Die maatskappy behels ’n aanbod van R18,50 per KLKaandeel of ’n ruiltransaksie van 1,4 Senwes- en/of 1,8 Senwesbel-aandele vir elke KLK-aandeel wat gehou word.

Dit beteken albei kontantaanbiedings is laer as KLK se netto batewaarde van R19,58 per aandeel soos einde Februarie 2018 in sy finansiële jaarverslag weerspieël is.

Markontleders voorspel reeds geruime tyd dat verdere konsolidasie in die sektor vir landboumaatskappye sal plaasvind, veral in die lig van verskerpte internasionale belangstelling in die plaaslike landboumark.