Klimaat kry makadamias nie onder
SUID-AFRIKA se makadamiabedryf beur voort, ondanks droogtetoestande, hittegolwe en haelstorms. Die jongste skatting vir die 2019-makadamia-oes is 58 500 ton, teenoor verlede jaar se rekordoes van 56 550 ton.
’n Opname onder makadamiakwekers en -verwerkers toon dat baie kwekers meen hulle gaan nie optimale oeste behaal nie, omdat groeitoestande tot dusver nie ideaal was vir die ontwikkeling van neute en opbrengs nie. Die Makadamiakwekersvereniging (Samac) sê in ’n verklaring die oes kon baie groter gewees het as dit nie vir moeilike weerstoestande was nie. “Makadamiabome het baie mooi geblom in die lente, maar warm weer in die vroeë somer het saam met min of laat reën heelwat klein neute laat val. In sommige gevalle het die neute wat nie geval het nie, nie tot die gewenste grootte ontwikkel nie,” sê Samac. In verskeie verbouingsgebiede kon neute ook
nie na wens besproei word nie weens waterbeperkings. Plase het in sommige streke ook onder haelstorms deurgeloop.
Nuwe aanplantings wat vanjaar in produksie kom, help egter om die swakker opbrengs van volwasse bome in hierdie streke teen te werk.
IN DIE DOP
Mnr. Jaap van Oenen van die Nederlandse bemarkingsmaatskappy Global Trading and Agency sê hoewel die mark vir neute in die dop verlede jaar weens hoë pryse getaan het, het die vraag weer verbeter nadat pryse vir dié neute gedaal het. Hoewel net 33% van Suid-Afrika se neute verlede jaar in die dop uitgevoer is, sê Van Oenen die vooruitsigte vir hierdie neute lyk steeds goed.
Suid-Afrika het in die verlede omtrent die helfte van sy makadamia-oes in die dop na China en ander lande in die Verre-Ooste uitgevoer.
Op lang termyn lyk Suid-Afrika se produksievooruitskouing belowend. ’n Skerp toename word oor die volgende paar jaar verwag, sê Van Oenen.
Hy meen die produksie van nuwe aanplantings gaan dit moontlik maak om groot volumes bestendig te lewer. “Makadamiaverkope is voorheen gepootjie deur onvoldoende volumes. Die gebrek aan bestendige lewering van groot volumes is een van die sterkste besware van aankopers.”
Die ongunstige weerstoestande gaan na verwagting ’n 5%-impak op vanjaar se oes hê, terwyl dit ook ’n impak op die grootte van volgende jaar se oes sal hê.