Moenie oortreders op jou plaas konfronteer - kry hulp
STEL jou plaaslike veiligheidsnetwerk in werking en ontbied die polisie, eerder as om verdagtes op jou plaas te konfronteer as jy misdaad vermoed.
Dít is die boodskap van Agri SA nadat mnr. CP Kriek van die Taaibosch-varkboerdery naby Fochville, Gautengse Jongboer van die Jaar in 2016, onlangs gewond is tydens ’n rooftog op sy plaas.
Mnr. Thinus van Zijl, uitvoerende hoof van Agri Gauteng, sê Kriek se plaaswag het op 31 Januarie verdagte bewegings op die plaas opgemerk en Kriek se voorman ingelig dat verdagtes besig is om sy transformator te steel. Kriek het mnr. Gawie Maritz, ’n polisiereservis, na die plaas ontbied.
Kriek, die voorman en Maritz is in sy bakkie, met die ligte afgeskakel, na die toneel om die verdagtes te konfronteer. Daar het hulle die bakkie se ligte aangeskakel en vier gewapende verdagtes betrap. Kriek het die verdagtes beveel om hul wapens neer te lê en drie waarskuwingskote afgevuur. ’n Skietery het ontstaan en Kriek is drie keer raakgeskiet. Hy word in ’n hospitaal in Potchefstroom behandel.
Een van die verdagtes is gewond en in hegtenis geneem nadat hy later in die veld gevind is. Die ander verdagtes het gevlug. Maritz is in die bors getref, maar is danksy sy koeëlvaste baadjie nie gewond nie.
DRUK UITOEFEN
Mnr. Tommie Esterhuyse, voorsitter van Agri SA se veiligheidskomitee, sê dit is beter om te observeer as om verdagtes te konfronteer, aangesien verdagtes deesdae dikwels gewapen is en rooftogte ál gewelddadiger word.
“As die plaaslike polisie traag is om te reageer, moet die inligting aan die plaaslike veiligheidsverteenwoordiger deurgegee word, sodat daar druk op die polisie se provinsiale leiers geplaas kan word om die plaaslike polisiekantoor aan te sê om op te tree,” sê Esterhuyse.
Van Zijl sê hulle beskou die voorval as ’n gewapende rooftog en nie ’n plaasaanval nie. Hy sê transformators word gesteel om uitmekaargehaal en as skrootmetaal verkoop te word.
Esterhuyse sê diefstal vir skrootmetaal word spesifiek in Agri SA se nuwe landelike beveiligingsplan uitgelig. Daar word beoog om dié plan op 15 Februarie met die samewerking van die polisie bekend te stel.