MATIESTUDENT ONTWIKKEL PROBIOTIKA VIR BRAAIHOENDERS
’n Probiotikum vir braaihoenders is suksesvol deur ’n doktorale student in mikrobiologie aan die Universiteit Stellenbosch ontwikkel en gepatenteer. Daar is wêreldwyd ’n neiging om eerder probiotika pleks van antibiotika te gebruik om die gesondheid en oorlewingskoers van braaihoenders te verbeter.
Dr. Deon Neveling, wat verlede Desember sy doktorsgraad aan die US ontvang het, sê hy het die weggooibinnegoed van die geslagte vrylopende hoenders van Mariendahl, die universiteit se proefplaas, versamel. Dit het hy dan tot ’n vloeistof verpulp en oor ’n paar honderd petribakkies versprei.
Neveling sê ’n mens moet letterlik “sterk staan” om hierdie soort navorsing te kan doen. Boonop moet jy dikvellig wees en probeer om almal wat ’n eiertjie te lê het oor die stank van jou werkstasie, te ignoreer.
Sodra die bakterieë begin groei het, het hy enkelkultuurkwekings geïsoleer en die spesie geïdentifiseer, ’n arbeidsintensiewe proses. Ná agt maande kon hy ses voordelige bakteriële spesies identifiseer – elkeen uit ’n baie spesifieke deel van die dermkanaal.
Dié bakterieë is toe aan ’n reeks toetse onderwerp om aan probiotikavereistes te voldoen. Die volgende stap was ’n toets om vas te stel of dit veilig as voerbymiddel is. Laastens moes die probiotikum sy staal toon rakende sy vermoë om die voorkoms van salmonella onder braaihoenders te verminder.
“In die Europese Unie word die gebruik van antibiotika in veevoer om groei te bevorder, verbied. Dit is gedoen om natuurlike seleksie vir antibiotikaweerstandige bakterieë te beheer en te verseker dat die antibiotika wat tans op die mark is, doeltreffend bly in die behandeling van infeksies by mens en dier.”
Die byvoeging van probiotika tot braaihoendervoer is egter nog ver van kommersiële toepassing. Dít is hoofsaaklik toe te skryf aan ’n gebrek aan diepgaande kennis van die ingewikkelde dinamika van die pluimveedermkanaal, en die magdom faktore wat die doeltreffendheid van probiotika beïnvloed.
Neveling sê die volgende stap sal wees om iemand te kry wat sal belê in die grootskaalse toetsing van sy nuut ontwikkelde probiotikum. Hy hoop om eendag ’n SuidAfrikaanse maatskappy te stig wat probiotika vir diere vervaardig.