Kry beter opbrengs met minder water
AFGRI se Lemang Agricultural Services en AJ Multitech het bewys oesopbrengste kan op ’n volhoubare manier verhoog word danksy die gebruik van Polyter .
Suid-Afrikaanse boere verstaan die volgende aanhaling van Benjamin Franklin beter as die meeste mense: “As die put droog is, sal ons die waarde van water ken.”
Water se waarde as ’n kommoditeit het die afgelope paar jaar al hoe duideliker geword, omdat Suid-Afrika van die ergste droogtes in die land se geskiedenis beleef. Die uitmergelende droogte het baie vrae oor die beskikbaarheid van water vir landbouverbruik laat ontstaan, te midde van groot onsekerheid en ’n gebrek aan oplossings.
MINDER WATER
Dr. Niko Wanders van die Universiteit van Utrecht in Nederland sê die droogtetoestande kan toegeskryf word aan ’n sterk El Niño-uitwerking, klimaatsverandering en ’n toenemende vraag na water. Met watervlakke wat kritiek laag is, oefen die publiek al hoe meer druk uit dat minder water aan die landbou toegewys word. Boere moet dus hul voedselproduksie en -gehalte handhaaf of verhoog, maar minder water gebruik.
Om produktiwiteit en die gehalte van gewasse op lang termyn teen die laagste koste te verseker, word nuwe tegnologie en volhoubare oplossings vereis. Suid-Afrikaanse landbougrond het meestal ’n hoë filtrasiekoers en ’n lae waterhoudingsvermoë, wat daartoe lei dat 70% van be- sproeiings- en grondwater, kunsmis en plantvoedingstowwe deur die grond uitgeloog word.
TEGNOLOGIE
Die produk Polyter® bied ’n volhoubare oplossing vir dié probleem. Polyter® is oor 20 jaar ontwikkel deur Philippe Ouaki di Giorno, ’n Franse landbouingenieur. Polyter® is spesifiek ontwikkel om afhanklikheid van waterhulpbronne te verminder, veral in gebiede waar waterskaarste ’n ernstige bedreiging vir die menslike bevolking en voedselsekerheid inhou.
Die produk is aan die voorpunt van superabsorberende polimeertegnologie in die landbou.
Polyter® is ’n granuliet wat bestaan uit 95% sellulose en 5% kaliumpoliakrilaat, stikstof, fosfor, kalium en spoorelemente. Polyter® kan water van tot 500 keer sy oorspronklike gewig opneem, en skep nodules of waterpakkies onder die plant se wortels. Polyter® is verryk met stikstof, fosfor en kalium en ses ander spoorelemente, wat in die nodules voorkom.
Plantwortels heg natuurlik aan die Polyter®-nodules. Die nodules tree op soos mikro-sponse wat vog (reën, besproeiing en grondwater) en opgeloste kunsmis en plantvoeding voortdurend in die gebruiksduur van drie tot vyf jaar opneem. Plantwortels kan dan die water en voedingstowwe onttrek wat danksy Polyter® deur osmose opgeneem word.
VOORDELE
Sodoende word water en voedingstowwe wat gewoonlik uitgeloog sou word, gekonsentreer en aan plantwortels beskikbaar gestel. Dit skep ’n gunstige omgewing waarbinne plante kan floreer.
Die simbiose van Polyter® en die plant se wortelstruktuur lei daartoe dat die plant dadelik vinniger ontwikkel, met ’n gesonde weerstand teen eksterne stresfaktore soos droogtes, vloede, siektes, hitte en insekte. Dit verhoog voeding en maksimaliseer plantenergie vir groei en produktiwiteit wat gehalte en opbrengs betref.
Die produk is natuurlik bioafbreekbaar in die grond oor ’n tydperk van drie tot vyf jaar. Dit hou verskeie voordele vir plante asook boere in.
Polyter® benodig 50% minder water en 30% minder kunsmis en voedingstowwe. Spoorelemente soos boor, koper, yster, mangaan, molibdeen en sink sorg vir ’n aansienlike toename in wortelontwikkeling (tot 300%) en ’n pH van 6,5-7. Nog voordele sluit in: Elektrisiteitsbesparing met besproeiing (pomp en toevoer); Verminderde inset- en bedryfskoste; Verhoogde opbrengs wat produksie betref; Verminderde groeitydperk; Verhoogde gewassiklusse per seisoen danksy versnelde groei;
Verhoogde gewasgehalte; Verlaagde afhanklikheid van reën en besproeiingswater; en Die bevordering van ontkieming, hergroei en ontwikkeling van plante. Die Cofrac 108-studie deur Anses (die Franse agentskap vir voedsel, omgewings- en beroepsgesondheid en -veiligheid) in Europa is ’n verpligte toets vir alle vervaardigers van superabsorberende polimere.
RESULTATE
Proewe met Polyter® het reeds belowende resultate vir die toekoms van die landbou in Suid-Afrika getoon. In die wintermaande van 2018 het AFGRI se Lemang Agricultural Services en AJ Multitech (Edms.) Bpk. ’n projek by AFGRI se proef- en opleidingsplaas op Vastfontein, Gauteng, uitgevoer. Die wateren kunsmisbesparingsvermoë van Polyter® is op die proef gestel. Slaai en spinasie is gebruik omdat die proewe deel was van ’n opleidingsprogram vir opkomende boere.
Plante wat met Polyter® behandel is, het 50% minder water en kunsmis ontvang. Die gevolgtrekkings van die proef is: Verhoogde wortelontwikkeling teenoor kontroleplante. Beter plantontwikkeling teenoor kontroleplante. Produkte van hoër gehalte en verhoogde opbrengs teenoor kontroleplante. Produkte wat hoër pryse op die mark behaal het.
EKONOMIE
Insetkoste kan dus baie verminder word danksy die kostebesparende uitwerking van Polyter® op ’n boerdery. Dit kan weer tot groter winsmarges lei.
Polyter® kan ook ’n opbrengs verseker in selfs die droogste toestande, in teenstelling met plante wat nie met dié produk behandel word nie. Gevolglik kan die risiko’s verbonde aan boerderye wat afhanklik is van reënval (droëlandgewasse) verminder word.
Plante se groeitydperk kan ook verkort word, waardeur die insetkoste mettertyd verlaag word. Polyter® se vermoë om opbrengsgrootte en die gehalte van ’n opbrengs te verhoog, lei regstreeks tot beter pryse op die mark en dus ’n hoër inkomste vir boere. Danksy ’n beter oesgehalte kan boere mededingender op die uitvoermark wees.
’n Groot pluspunt is dat Polyter® in al die landboubedrywe gebruik kan word. Dit is baie waardevol vir boere, omdat dit die behoefte aan deurlopende grondhidrasie verminder en die water behou wat in die grond beland. Dit kan die uitwerking van stres op gewasse, wat deur periodieke en toenemend onvoorspelbare reënvalpatrone veroorsaak word, uitskakel.
Die produk is voordelig vir alle plantspesies, en dus kan droëland- en besproeiingsboere wat met graan, groente, vrugte en neute boer, daarby baat vind.
Polyter® kan bydra tot doeltreffender watergebruik en beter produksiemetodes in die bosbou-, tuinbou- en wingerdbedryf. Dit kan ook in hidroponiese en akwaponiese stelsels gebruik word, asook in rehabilitasie- en landskapprojekte.
AANPASSING
Die Suid-Afrikaanse landbousektor beleef groot onsekerheid. Klimaatsverandering is ’n werklikheid en dwing die bedryf om te verander. Dit het tyd geword om vernuwende produkte en nuwe tegnologie te gebruik en aan te pas by veranderende toestande, sodat beperkte hulpbronne doeltreffend gebruik kan word en dit die toekoms van die landboubedryf help verseker.
Polyter® bied nie net ’n antwoord op die droogteprobleem nie, maar verbeter ook grondgesondheid. Die produk is ideaal vir opkomende boere en verseker voedselsekerheid en beter winsgewendheid.
Polyter® bied gemoedsrus vir boere, en selfs vir finansiers en versekeraars.