n Nuwe, skoon b(l)aadjie
Dié week bestuur ons twee ou bekendes wat nuwe baadjies dra.
ISUZU MU-X 4X4 AT6
Om voor te bly op die woelige Suid-Afrikaanse voertuigmark, moet jou stroom planne nooit opdroog nie.
Die nuutste is die herlewing van die ou Chevy Trailblazer as die Isuzu mu-X.
“Die Chevy wat?” sal baie mense vra. Voordat GM Suid-Afrika (weer) verlaat het, was die Trailblazer sy vlagskip. Dit was (is) ’n groot, gerieflike veldvoertuig wat op die Isuzu KB se onderstel gegrond is. ’n Verdienstelike ryding, maar hy kon nie uit die Fortuner se skadu kom nie.
Nou het hy as’t ware ’n tweede kans, en dié keer sal hy waarskynlik beter vaar omdat Isuzu so ’n gerespekteerde handelsmerk is. Om te oorleef, moet hy egter meer bied as ’n Isuzu-embleem op sy snoet.
’n Ryding wat op ’n afsonderlike onderstel gebou word, soos die Fortuner, Everest en Pajero Sport, ly in die algemeen aan ’n stamperige rit, selfs sonder ’n bakkie se tipiese bladvere. Daarteenoor bied die bakwerk-onderstel-kombinasie van ’n RAV-4 of Kuga ’n sagte rit.
Maar die Isuzu mu-X is ’n anderster perd. Hy neem die KB/D-MAX se goeie ritgehalte en maak dit nog beter. Op ’n gaar grondpad is sy rit byna sussend. Klankdemping is ook ’n sterk punt – wat vering, wind- en enjingeraas betref. Daarby werk die outomatiese sesgangratkas gladweg, en die mu-X het ook geen slegte drinkgewoontes nie.
Die staatmaker 3 liter-enjin (130 kW, 380 N.m) uit die D-MAX verrig hier diens.
Iets wat die 4x4-geesdriftige gaan pla, is dat ’n ewenaarslot ontbreek. Nog iets wat soek is, is die Trailblazer se deftige paneelbord.
Die mu-X het ’n digitale skerm met satellietnavigasie. Met behulp van ’n kamera wys dit ook wat agter jou aangaan wanneer jy die rathefboom in tru sit. Vorentoe verskerp LED-kopligte die bestuurder se sig.
Die mu-X se gemaklike sitplekke is met leer oorgetrek. Buiten die vyf vir grootmense is daar ook twee sitplekkies heel agter wat moeiteloos uit die bagasieruim kan verrys.
Ses lugsakke help om jou mense veilig te hou. Sy ander veiligheidskenmerke sluit in elektroniese stabiliteitsbeheer en ’n funksie wat ’n sleepding wat wil swaai, tot bedaring kan bring.
Dis onwaarskynlik dat die mu-X naastenby so gewild as die Fortuner gaan wees, maar dis ’n waardige alternatief – en ’n les in die bou van ’n rateltaai ryding wat swak grondpaaie ry sonder om die passasiers rond te skud. Prys: R629 100.