HONDA HR-V 1.8 ELEGANCE CVT

Baie jare lank was die bekwame CR-V Honda se alleenstryder onder die melkbaard-veldvoertuie. Omdat almal deesdae hoog wil sit terwyl hulle bestuur, het Honda toe ook die HR-V en later die BR-V by sy stal gevoeg. Laasgenoemde is niks om oor te jubel nie, maar die HR-V verdien aandag – ook omdat hy onlangs opgeknap is.

Die veranderinge is nie ingrypend nie en meestal kosmeties. Die neus is aantrekliker, en die 1,8 liter-weergawe het nou ’n kamera agter vir veilig terugstoot. Sy buitengewoon ruim binnekant, goeie bougehalte en doeltreffende brandstofver-

bruik maak die HR-V ’n aantreklike opsie, maar hy’s nie sonder foute nie. Dit sluit in oormatige bandgeruis teen 120 km/h (en vinniger) en ’n oudmodiese vermaakskerm met ikone wat soms te klein is om maklik raak te druk.

Gruispaaie en stadsverkeer is sy kos, maar sy knieë voel soms styf op teerpad wat al uitgery is, soos die R43 tussen Caledon en Villiersdorp in die Wes-Kaap.

Die HR-V is nie met ’n handratkas beskikbaar nie, maar met ’n outomatiese CVT- “katrolratkas”, wat weens sy neiging om die enjin soms te laat neul, nie in almal se smaak val nie. Prys: R419 900.