GEMIDDELDE AVOKADO-OES VANJAAR VERWAG

Nadat avokadoboere verlede jaar ’n uitstekende oes gehad het, sal boere vanjaar weer ’n gemiddelde oes behaal.

Volgens mnr. Derek Donkin, uitvoerende hoof van Subtrop (die oorkoepelende liggaam vir die Suid-Afrikaanse avokado-, lietsjie en mangobedryf), is die vooruitskatting dat die land ongeveer 15,5 miljoen kartonhouers van 4 kg elk vir die uitvoermark sal lewer.

Verlede jaar is 21 miljoen kartonhouers gelewer.

Volgens hom was verlede jaar ’n uitsonderlike jaar omdat toestande reg was vir vrugset en -ontwikkeling ná ’n paar jaar van droogte. Daarby het talle jong boorde in produksie gekom. Hy sê vanjaar het hittegolftoestande blom en vrugset gekniehalter.

Donkin sê hoewel die uitvoermark belangrik is vir die kwekers, plaas hulle ook ekstra klem op plaaslike markontwikkeling, hetsy dit vir die varsprodukmarkte, regstreekse verkope aan handelaars, die informele sektor of verwerkers is. Hy sê die helfte van die oes gaan jaarliks na die plaaslike mark.

Suid-Afrika is ook lid van die Wêreld-avokado-organisasie, wat bestaan uit lande soos Peru, Spanje, Chili, Mexiko, en vanuit ’n produksieperspektief ook Tanzanië en Mosambiek. Donkin sê hoewel dit ’n nuwe organisasie is, het dit reeds heelwat momentum. Die organisasie stel geld beskikbaar vir die bevordering van avokadoverbruik, hoofsaaklik in Europa.

“Daar is ’n groeiende vraag, en die internasionale organisasie maak seker dat die vraag aanhou groei saam met die groei in produksie wat plaasvind.”