Beefmaster-sukses: Die Van Reenen-storie
Wat verg dit om ’n veerkragtige besigheid in die beesvleisbedryf te word? Die antwoord is vernuwing gekombineer met tradisionele gesinswaardes, sê mnr. Roelie van Reenen, bestuurder van Beefmaster se verskaffingsketting.
Beefmaster (Edms.) Bpk., ’n toonaangewende spesialisprodusent van gehalte-beesvleisprodukte, is in 1965 deur mnr. Lourie van Reenen begin as ’n klein beesvoeronderneming. Vandag is dit ’n familiebesigheid in die hande van Lourie se seuns, Louw en Roelie van Reenen, en een van die vyf grootste produsente van beesvleisprodukte in Suid-Afrika.
Beefmaster is betrokke by die hele waardeketting, van die grootmaak van en boer met beeste tot die lewering van vleisgebaseerde produkte aan kliënte. Dit vereis baie grondbeginsels wat nie tradisioneel deel van landbou is nie, soos vlootbestuur van vragmotors, grondverskuiwingstoerusting, beesgesondheid en -voer, die sny en verpakking van die vleis, en ten volle toegeruste werkswinkels.
Mnr. Roelie van Reenen, verskaffingskettingbestuurder van Beefmaster, sê dit kan moeilik wees om in die landbousektor te werk omdat daar faktore buite jou beheer is wat die besigheid beïnvloed. Die enigste manier om haakplekke te oorkom, is om voorbereid te wees, maar tog aanpasbaar en buigsaam.
“Vir ons beteken dit om te diversifiseer vir verskansing teen moeilike tye. Ons glo byvoorbeeld alle beesrasse het die potensiaal om buitengewone vleisprodukte te lewer.
“Dit maak dit vir ons moontlik om saam met gevestigde, asook opkomende beesboere te werk, ongeag die beesras waarmee hulle boer. Daar is die wanopvatting dat ons net saam met boere werk wat met Beefmasterbeeste boer, maar dit is nie die geval nie.”
Voorbeelde van ander beesrasse wat deur die handelsnaam aanvaar word, sluit onder meer in Bonsmara, Brahman, Angus, Hereford, Simmentaler, Afrikaner, Nguni, Holstein-Fries, asook enige kruisras van hulle.
“Ons smee sterk verhoudings met gevestigde én opkomende boere om toegang te verkry tot ’n verskeidenheid beeste, ongeag ras. Ons help boere om die gehalte en volhoubaarheid van hul kuddes te verbeter deur onder meer opleiding, mentorskapprogramme en afsetooreenkomste aan hulle te bied,” sê Van Reenen.
Hy voeg by die kern van Beefmaster se sukses is sy verhoudings met al sy belanghebbendes.
“Ons is al byna drie dekades lank lid van die Suid-Afrikaanse Voerkraalvereniging, wat beteken ons dien as ’n bedryfstem vir die boere met wie ons ’n verhouding het, omdat ons hul sakebelange op die hart dra.”
Dit dra verder by tot Beefmaster se hulp aan boere om toegang te verkry tot nuwe markte en oplossings wat stabiliteit en gemoedsrus bied. EEN GROOT SPAN
“Ons familiebesigheid help ons om die bedrywighede van familiebeesplase te verstaan. Wat jy
doen, is nie net ’n werk nie – dit is jou manier van lewe. Gesinsbyeenkomste en gesprekke word dus aangevuur deur geesdriftige besprekings, en kliënteverhoudings bestaan nie net tydens sake-ure nie.”
Van Reenen voeg by dit is die uitgangspunt van die besigheid om sy kliënte en werknemers soos familie te behandel.
“By Beefmaster werk ons saam as een groot span. Dit het ’n belangrike rol gespeel in die bou van ons kleinskaalse onderneming tot ’n suksesvolle korporasie.
“Ons werknemers is deel van ons familie. Ons is trots op hul prestasies en werk saam met hulle om te beklemtoon hoe elke taak bydra tot die groter prentjie. Ons het ’n wonderlike kultuur binne die besigheid gevestig.”
TOEKOMSPLANNE
Hoe kan Beefmaster vernuwend wees en steeds getrou bly aan sy toewyding tot tradisie?
“’n Rykdom van kennis en ervaring is deur die geslagte oorgedra, maar ons moet aanhou kritiese vrae vra en ontleed hoe ons dinge beter kan doen. Ons het groot sukses behaal met nuwe tegnologie en by die beste praktyke wêreldwyd geleer. Deur ontvanklik te wees vir verbetering, is hoe ons beter en doeltreffende oplossings vir boere en kliënte kan bied.”
Beefmaster se moderne tegnologie stel die maatskappy in staat om pasgemaakte produkwelstandsoudits te en produkte op bestelling te maak vir van die grootste besighede in die voedselbedryf. Daarmee durf hulle die dubbele uitdaging aan van verhoogde mededinging, en hoe om die beste moontlike beesvleis kostedoeltreffend te produseer.
Gehaltebeheer en die handhawing van die hoogste gesondheidsen veiligheidstandaarde is noodsaaklik. Beefmaster dwing streng prosesse af, wat aan die maatskappy FSSC 22000-voedselveiligheidsertifisering besorg het. Dit word erken deur die Global Food Safety Initiative.
As ’n groot verskaffer aan die kitskosgroep McDonald’s is Beefmaster die Suid-Afrikaanse vennoot wat dié maatskappy se streng dieregesondheidsorg- en deurgaans die afgelope dekade geslaag het om gesonde diere- en vleisprodukte van hoë gehalte te verseker.
Van Reenen sê Beefmaster se toekomsvisie is om te sorg dat meer boere die skaal en hoëgehalte-kuddestandaarde bereik wat nodig is om voordeel te trek uit geleenthede wat deur die vleisbeesbedryf geskep word.
“Deur samewerking kan ons goeie beesvleisprodusente bystaan om hul winsgewendheid te verhoog. Dit lei op sy beurt tot verbeterde indiensnemingsgeleenthede en groei in ons ekonomie.”
NAVRAE: www.beefmaster.co.za; e-pos: hotline@beefmaster.co.za; tel. 053 441 9107/053 841 0145.
‘Ons smee sterk verhoudings met gevestigde én opkomende boere om toegang te verkry tot ’n verskeidenheid beeste, ongeag ras.’