VERTIKALE BOERDERY: GROEI OP PAD

Die prys van die invoer van vertikale boerderytegnologie deur die onderneming Vertical Farming van Woodmead in Johannesburg het die afgelope 12 maande met bykans 35% gedaal. Mnr. Kobus Venter, uitvoerende hoof van die onderneming, sê ’n deel van dié daling kan aan die sterker rand toegeskryf word, maar die grootste deel is danksy ’n daling in die koste van LED-tegnologie van die groeiligte.

“Die binnenshuise groeiligte, wat ’n baie duur tegnologie is, raak al hoe goedkoper. Ons bou skeepshouer-hidroponikastelsels in Suid-Afrika en voer die ligtoebehore en -drywers in. Die betrokke tegnologie raak ook ál doeltreffender. Die bedryfskoste van die stelsels maak dus al hoe meer sin.

“Daar is nog nie veel plaaslike boere wat kommersieel vertikaal boer nie omdat die koste tot dusver te hoog was. Die voordeel daarvan om die koste van koelkamer-opberging en vervoer uit te skakel omdat jy op jou verbruikersmark se voorstoep kan boer, die verlaagde koste en bekostigbare bedryfskoste kan meebring dat ons taamlike groei in die oprigting van dié soort boerderye in die volgende 12 tot 24 maande kan sien,” sê Venter.

By die Westwood Village-inkopiesentrum op Boksburg is daar ’n skeepshouer-boerdery opgerig. Die boer hoef nie verder as 300 m na ’n supermark of restaurant te loop om sy produkte soggens af te lewer nie.

“Tans is krulblaarkropslaai die grootste produk in daardie boerdery, maar daar word ook met kruisement en basiliekruid geëksperimenteer.”