SWAK EKONOMIE STUIT KOPERS NIE
Nieteenstaande die swak ekonomiese toestande, is die vraag na uitstekende Arabierperde steeds goed, sê mnr. Jack Maritz, veteraan-teler van die Sidi-Arabierperdstoetery van Upington.
Dit lyk asof kopers hul hande diep in die sak steek vir potensiële kampioene.
Op Maritz se veiling verlede November is 15 Arabiere van sy stoetery en dié van sy neef, mnr. Fanie Maritz (Shaheer-Arabiere, Upington), aangebied.
Merries van vier jaar oud (waarvan twee dragtig was) het gemiddeld R66 300 behaal.
Jaaroudhingste is teen gemiddeld R24 000 verkoop. Twee van die drie uithourit-reuns van Egiptiese bloedlyne wat aangebied is, het hoë pryse van R50 000 en R32 000 behaal.
Maritz ondervind belangstelling van oor die hele Suid-Afrika en vanuit Namibië.
Vir hom beteken ’n Arabier van gehalte ’n dier met die regte konformasie en “’n perd wat ongetwyfeld as die Arabier-tipe uitgeken kan word”.
Hy sien ’n afname in die vraag na middelmatige diere.
Die Arabierperdtelersgenootskap van Suid-Afrika het die afgelope tyd ook ’n afname in sy ledetal tot net meer as 500 beleef.
Een van die redes wat daarvoor aangevoer kan word, is die feit dat deelname aan uithouritte nie verpligte lidmaatskap vereis nie.
Een van die groot geleenthede wat vir die ras op 2 tot 4 Mei by Upington voorlê, is die Twee Nasies-kampioenskap wanneer ruiters van Namibië teen plaaslike ruiters meeding.
Intussen het die inskrywings vir Perd van die Jaar-kampioenskap, waaraan kampioene van verskeie perderasse tussen 19 en 24 Februarie by die Afridome op Parys deelneem, gesluit.