Dié week in die landbou
OORSKAT
Soos verwag was die mielie-oes vir 2017-’18 oorskat. Dit is met 421 210 ton (3,26%) afwaarts aangepas ná werklike lewerings in ag geneem is. Volgens die Nasionale Oesskattingskomitee staan die finale oes nou op 12,51 miljoen ton, teenoor die laaste skatting van 12,931 miljoen ton. Vir wit mielies is die finale oes 6,54 miljoen ton, wat 261 560 ton of 3,85%, minder is as die laaste skatting. Die finale geelmielie-oes is 5,97 miljoen ton, 159 65 ton of 2,6% minder as die finale skatting. Die
Nasionale Landboubemarkingsraad skat die oordragvoorraad mielies op sowat 3 miljoen ton, waarvan 1,6 miljoen ton wit en 1,4 miljoen ton geel sal wees. Lees meer by: bit.ly/2EbXQsr
WETWYSIGER
Die voormalige Minister van Landbou, me. Thoko Didiza, is verkies tot voorsitter van die Parlement se ad hoc-komitee wat die wetsontwerp moet formuleer vir die voorgestelde wysiging van artikel 25 van die Grondwet om onteiening sonder vergoeding duidelik in die Grondwet in te skryf. Sy is op die komitee se eerste vergadering verlede week verkies. Sy het ook voorgestel dat ’n vergadering op Vrydag 22 Februarie belê moet word om die werksprogram van die komitee uiteen te sit. Die komitee bestaan uit ses LP’s van die ANC, twee van die DA, een van die EFF en twee van die ander partye. Die “ander partye” sal in die komitee deur twee IVP-LP’s verteenwoordig word. Didiza was die Minister van Landbou en Grondsake van 1999 tot 2006, en Minister van Openbare Werke van Mei 2006 tot 2008.
BREXIT-REDDING
Die Regering druk hard om vroeg in Maart ’n alleenstaande ooreenkoms met Brittanje te sluit wat die huidige ekonomiese vennootskapsooreenkoms (EPA) tussen die Europese Unie (EU) en Suider-Afrikaanse Doeane-unie (Sadu) vervang, voordat Brexit ’n realiteit word. Me. Niki Kruger, hoofdirekteur van handelsregulasie by die Departement van Handel en Nywerheid, sê met Brexit sal die EPA, wat onder meer marktoegang bewerkstellig vir verskeie landbouprodukte, nie meer van toepassing wees op Brittanje nie. Altesaam 40% van Suid-Afrika se landbou-uitvoer is na Brittanje. Sonder die EPA sal uitvoerders invoerbelasting van 4% tot 15% in Brittanje moet betaal, sê sy.
GRIEPERIG
Hoogs aansteeklike voëlgriep is verlede week by ’n broeikolonie brilpikkewyne in Namibië opgemerk. Luidens ’n verslag van die internasionale organisasie vir dieregesondheid (OIE) het pikkewyne op Halifax-eiland, ’n klein rotseiland by Lüderitz, voëlgriepsimptome getoon, onder meer swak koördinasie, stuipe, ondeursigtige korneas en lomerigheid. Die siekte is volgens die OIE tans beperk tot brilpikkewyne en raak nie ander wilde voëls op die eiland nie.
KLEINSAKE-VRIENDELIK
Pres. Cyril Ramaphosa het verlede week die Mededingingswysigingswet van 2018 onderteken. Luidens ’n verklaring van die Presidensie gee dié gewysigde wet groter duidelikheid oor wat verbode praktyke is en wat die owerhede as die misbruik van markoorheersing beskou. Daar word verwag dat dit administratiewe prosesse by die mededingingsowerhede doeltreffender sal maak, en die instellings verantwoordelik vir beleid en toepassing van die mededingingsbeleid sal versterk. Dit is onder meer daarop toegespits om uitkomste vir klein ondernemings en dié in swart besit te verbeter.
SEEKENNIS
Mnr. Nick Serfontein, voorsitter van die Sernick-groep, beesboer, en lid van pres. Cyril Ramaphosa se grondadvieskomitee, is een van die sprekers op Laeveld Agrochem se 2019 Seil-Safari. Dié safari vind plaas van 1 tot 5 April. Mnr. Christo Briedenhann, uitvoerende hoof van StratTech, sal lig werp op nuwe tegnologie wat boere help om risiko’s te bestuur. Mnr Phillip Venter, Laeveld Agrochem se bemarkingsbestuurder vir plantvoeding, gaan gesels oor presisieboerderytegnologie en plantvoeding. Vir nog inligting, besoek: https://seilsafari.co.za.