Clover-koper skrik nie vir aktiviste
DIE moontlike onttrekking van ’n swartbemagtigingsgroep aan die oorname van Clover sal nie dié multimiljardrand-transaksie ontspoor nie.
Hierdie versekering is deur die Milco-konsortium gegee nadat dit bekend geword het dat Brimstone, wat R726 miljoen sou betaal om 15% van die nuwe maatskappy te bekom, sy betrokkenheid heroorweeg. Dít volg ná dreigemente deur ’n pro-Palestynse aktivistegroep, BDS, dat hy ’n verbruikersboikot teen Clover se produkte sal instel as die transaksie voortgaan.
BDS het in die verlede reeds verskeie kere teen Woolworths betoog wanneer hy Israelse produkte op dié winkelgroep se rakke gevind het.
Die grootste aandeelhouer in die Milco-konsortium is die Israelse maatskappy Central Bottling Company (CBC) met ’n belang van 59,9%.
HEROORWEEG
Milco word deur BDS van menseregtevergrype en die oortreding van internasionale wette in die besette Palestynse gebiede beskuldig. Op Donderdag 7 Fe- bruarie het Brimstone, wat sterk bande met Suid-Afrikaanse vakbonde het, ’n noodvergadering gehou, waarna die direksie besluit het om die maatskappy se deelname aan die konsortium te heroorweeg.
“Met ons maatskappy se waardegedrewe identiteit in gedagte het ons kennis geneem van die wydverspreide woede oor Brimstone se deelname aan die voorgestelde transaksie om die Suid-Afrikaanse maatskappy Clover te koop. Brimstone het besluit om sy rol in die transaksie te heroorweeg,” luidens ’n verklaring.
Teen druktyd kon Brimstone nog nie bevestig of hy wel kop uittrek nie.
Milco het hierna sy verbintenis tot die transaksie herbevestig, ondanks BDS se dreigemente van verdere aktivistiese optrede. Hy sê in ’n verklaring hy neem kennis van Brimstone se standpunt en het bygevoeg Milco verteenwoordig ’n sterk groep maatskappye en beleg- gers wat steeds opgewonde oor die geleentheid is.
CBC het ontken dat hy enige fabrieke in die besette Wesoewer of Golan-hoogland het, soos BDS beweer. CBC se verspreidingsentrum, wat luidens BDS se verklaring in die Golan-hoogland is, is volgens CBC in ’n nywerheidsgebied in Jerusalem geleë.
PRYSDALING
Dié verwikkeling het Clover se aandeelprys met meer as 7% laat daal nadat dit aanvanklik stewig gestyg het danksy die nuus dat Milco R25 per aandeel aan Clover se aandeelhouers aanbied‒ 25% bo die vlak waarteen die aandeel voor die aanbod verhandel het. Die aanbod is deur plaaslike ontleders geloof, veral omdat Clover reeds ’n paar jaar probeer om ’n koper te kry en sy aandeelprys voor dié transaksie jare lank agteruit geboer het.
Teen Woensdag 13 Februarie het Clover 7,56% swakker as in die vorige week gevaar teen sowat R21,26 per aandeel.
Die Suid-Afrikaanse Regering het intussen sy steun aan die Clover-transaksie toegesê. “Indien dit deur die betrokke reguleringsowerhede goedgekeur word, sien ons niks verkeerd met die transaksie nie. Suid-Afrika is oop vir sake,” het mnr. Ndivhuwo Mabaya, woordvoerder van die Department van Internasionale Betrekkinge en Samewerking, aan Sunday Tribune gesê. Hy het egter bygevoeg dat die Regering steeds saam met internasionale vennote werk om die Palestynse kwessie op te los.
NUWE BELEGGER
Suid-Afrikaanse vakbonde, soos die Food and Allied Workers’s Union, wat ’n paar duisend werknemers van Clover verteenwoordig, het intussen gesê daar moet ’n ander ankerbelegger as CBC gevind word en dat “apartheid-Israel” nie toegelaat moet word om in Suid-Afrika sake te doen nie.
Die voorgenome belegging van R4,8 miljard sal volgens ontleders nie net broodnodige regstreekse buitelandse beleggings na Suid-Afrika bring nie, maar ook plaaslike werkgeleenthede skep.
Die ander vennote in die Milco-transaksie is Incubev, ’n internasionale voedsel-en-koeldrankmaatskappy wat 8,3% sou verkry, en Plougshare, ’n beleggingsgroep met ’n belang van 8,3%. Clover se huidige uitvoerende bestuur neem ook ’n belang op.
’Brimstone het besluit om sy rol in die transaksie te heroorweeg.‘