DIE ANDER SÊ
DIE afgelope 14 weke het die beskikbaarheid van Eskom se vloot kragsentrales gewissel van 67,63% tot 61,86%, volgens dié kragmaatskappy se weeklikse statusverslag. Dit is teenoor Eskom se teiken van 80%, en die 78% wat hy aangeneem het in sy aanvanklike tariefaansoek vir die volgende drie jaar. Die Nasionale Energiereguleerder het hom aangeraai om dié syfer aan te pas tot rondom 72%. Lede van Nersa was tydens openbare verhore oor die tariefverhogings egter van mening dat selfs dié syfer onbereikbaar kan wees, gesien teen die huidige 60% beskikbaarheid.
In die statusverslag wys Eskom ook daarop dat die spitsaanvraag vir elektrisiteit in die vyfde week van 2019 om en by 28 880 MW was, teenoor 34 242 MW in 2018, 35 361 MW in 2017 en 34 157 MW in 2016. Eskom se maksimum netto kapasiteit, wat invoer en noodopwekking insluit, is 46 292 MW, wat die maatskappy met ’n gemaklike reserwe van 17 412 MW laat.
Ten spyte hiervan is daar ’n voorsieningstekort van by die 4 000 MW.
Eskom se vooruitskouing vir die komende drie maande lyk ook nie belowend nie. Vir minstens agt uit die komende 13 weke (verlede week ingesluit) verwag Eskom dat hy nie sy reserweteiken sal haal nie, en moontlik ook nie die vraag nie, wat beteken beurtkrag sal hoogs waarskynlik plaasvind. Vir die week van 6 Mei, wanneer die verkiesing plaasvind, voorspel hy ’n definitiewe tekort, en sal beurtkrag dus ’n sekerheid wees.