Dow DuPont-baba mik groot
’N AFDELING wat boere op die hoogte hou van die nuutste handelsooreenkomste en residuvereistes wêreldwyd is een van Corteva Agriscience se planne om homself as ’n hoofspeler onder landbou-insetverskaffers te vestig.
Dié maatskappy is gebore uit die samesmelting van die landbouchemikalieëmaatskappy Dow en die Amerikaanse landboureus DuPont. Dit funksioneer tans as ’n afdeling die nuwe, gekonsolideerde maatskappy, maar sal later vanjaar as ’n onafhanklike maatskappy geregistreer word.
Mnr. Igor Teslenko, Europese streekhoof by Corteva Agriscience, het op ’n bekendstellingsgeleentheid van die maatskappy by Fruit Logistica in Berlyn, Duitsland, gesê die maatskappy sal hom toelê op saad en landbouchemikalieë. Hy het reeds groot handelsmerke, soos Pannar en Pioneer, onder sy vaandel.
“Ons lewe in ’n tyd van oorvloed, maar tog het een uit elke nege mense op aarde nie genoeg kos om te eet nie. Boonop gaan die wêreldbevolking byna verdubbel teen 2050, en dít teen die agtergrond van klimaatverandering, ’n afname in vrugbare grond en veranderende eetpatrone.”
REGMATIGE PLEK
Teslenko het gesê hy glo Corteva sal een van die belangrikste landbou-insetverskaffers word.
“Ons wil bekend staan as ’n maatskappy waarop die sektor kan staatmaak vir gesonde, veilige en volhoubare landboubinne produkte.”
Mnr. Tom McHale, hoof van die beoogde program oor handelsooreenkomste en residuvereistes, het gesê: “Ons wil hê ons klante moet voor hulle enige gewas plant, al weet watter vereistes verskillende markte aan hulle gaan stel. Ons wil hulle van raad en produkte voorsien om seker te maak hulle kry maklik toegang tot hul teikenmarkte.
“Ons doel is regtig om die lewe van die boer én die verbruiker te verryk, terwyl ons vooruitgang vir selfs die volgende geslagte nastreef.”