‘Ken boere wanneer droogtehulp toegewys word’
KWANALU verwelkom enige droogtehulp vir Kwazulu-Natal, maar dit is van die grootste belang dat die georganiseerde landbou daarin geken moet word om te verseker dat geld en ander bystand doeltreffend benut word.
Só sê me. Sandy la Marque, uitvoerende hoof van dié landbou-organisasie in reaksie daarop dat die Nasionale Rampbestuursentrum vroeër vandeesmaand ’n verdere R122 miljoen vir droogtehulp in die provinsie bewillig het, ten spyte daarvan dat R220 miljoen wat voorheen toegewys is, spoorloos verdwyn het. Dit was toe KwaZulu-Natal in 2015 weens ’n verlammende droogte tot rampgebied verklaar is.
“Dit is jammer dat droogtehulpgeld in die verlede gemanipuleer en misbruik is deur mense wat nie boere is nie. Bona fide-boere het in die meeste gevalle min of geen hulp gekry nie. Daar is gevalle in sekere distrikte aangemeld waar vragmotors sou opdaag en voerbale aflaai. Dit was egter geensins gekoördineer nie. Berigte is ontvang dat die bale weer opgelaai en verkoop is en gevolglik nooit by die boere uitgekom het nie. Daar was ook berigte van organisasies wat droogtegeld ontvang het, maar die geld is nie aan die ware begunstigdes oorgedra nie.”
KOMMER
Volgens La Marque moet die Regering verseker dat toewysings nie gekaap word deur gewetenlose uitbuiters of amptenare nie.
Kwanalu spreek al geruime tyd sy kommer uit oor die wanbesteding van hulpgeld. “Ongelukkig is daar ’n gebrek aan aanspreeklikheid en naspeurbaarheid. Dis ’n geval waar iemand wat die geld
ontvang, ook die koördineerder, regter en jurie vir die gebruik daarvan is. Dit is dan maklik om dit te misbruik.”
Mnr. Khaye Nkwanyana, woordvoerder van die Minister van Landbou, Bosbou en Vissery, het ook bevestig die beweerde wanbesteding in KwaZulu-Natal het te make met die droogtehulpgeld van sowat vier jaar gelede wat korrup herlei is. Die KwaZulu-Natalse regering is steeds besig met ondersoeke en wag nog vir die finale verslag sodat diegene wat vir die dade verantwoordelik was, vervolg kan word.
ONDERSOEK
Me. Nomusa Dube-Ncube,
KwaZulu-Natalse LUR vir samewerkende regering, het op ’n nuuskonferensie gesê die ondersoeke behoort taamlik gou afgehandel te wees. “Ons wil verseker dat wanneer geld bewillig word vir ’n spesifieke behoefte in gemeenskappe, dit bestee word waar dit veronderstel is om bestee te word.”
Intussen sê sy hulle kyk na waterbeperkings om die impak van die droogte te versag.
Dit, sê La Marque, sal net ’n verdere terugslag vir besproeiingsboere wees.
“Dalende damvlakke is ook ’n groot bekommernis. Daar is reeds baie gevalle van oeste wat misluk.”