SPEENKALFPRYSE VOLG SENTIMENT
SPEENKALFPRYSE het verlede week in sommige dele van Suid-Afrika effens gedaal, en in ander gebiede effens gestyg.
“Namate reën in party streke voorkom, styg speenkalfpryse in sekere gebiede,” sê mnr. Dawie Maree, hoof van landbou-inligting en bemarking by FNB.
Volgens www.vleispryse.co.za het speenkalfpryse in die NoordVrystaat die afgelope week gedaal nadat prysstygings die vorige twee weke aangeteken is. ’n Prysdaling van R2,41/kg is vir speenkalwers wat minder as 200 kg lewende gewig is, aangeteken. Die prys was op verlede week se veilings R32,55/kg, teenoor R34,96/kg die week vantevore.
Speenkalwers tussen 200 kg en 250 kg lewende gewig, en kalwers van meer as 250 kg lewende gewig se pryse het met onderskeidelik 30c/kg en 65c/kg gedaal tot R31,21/kg en R27,12/kg.
Van 15 Desember verlede jaar tot 15 Januarie vanjaar het speenkalfpryse in dié omgewing met 20% gedaal.
PRYSE ‘ONTPLOF’
Mnr. André Kock, afslaer van André Kock en Seun Afslaers, sê pryse op veilings by Vryburg het voorverlede week “ontplof”, met pryse wat by R37/kg gaan draai het vir speenkalwers van 200 kg lewende gewig.
“Op ’n veiling by Tosca verlede week het pryse gewissel rondom R32/kg en R33/kg vir speenkalwers tussen 200 kg en 250 kg lewende gewig.”
Kock sê hulle sien die gunstige uitwerking wat die reën die afgelope tyd in die somerreëngebied op die aanbod van diere en gevolglik pryse het.
Mnr. Naudé Pienaar, assistenthoofbestuurder van Agri Noordwes, sê vroeg verlede week se reënvalmetings in dié provinsie het gewissel van 15 mm tot 75 mm.
SIELKUNDIGE IMPAK
Volgens die weeklikse veilingspryse by Gouda wat deur BKB verskaf word, het die prys vir alle
‘Die vleisprys-mielieprys-verhouding moet nooit uit die oog verloor word nie.’
kategorieë speenkalwers gestyg. Die prys vir speenkalwers minder as 200 kg lewende gewig was R30/kg, vergeleke met R29/kg verlede week.
Die pryse vir speenkalwers tussen 200 kg en 250 kg, en tussen 250 kg en 300 kg lewende gewig het in albei kategorieë met R2/kg gestyg, tot onderskeidelik R29/kg en R28/kg.
Maree sê die daling in mieliepryse die afgelope tyd het ’n gunstige impak gehad op voerpryse en gevolglik voerkrale se vermoë om diere te kan hanteer. “Die vleisprys-mielieprys-verhouding moet nooit uit die oog verloor word nie.”
Volgens Maree en Kock moet die sielkundige impak wat die droogtetoestande en laat reën op die belanghebbendes in die mark het, nie onderskat word nie.