INTERNASIONALE LANDBOUNUUS
1 AMERIKA | Vleisreus sprei sy vlerke
Op dieselfde dag dat hy teleurstellende finansiële resultate bekend gemaak het, het die kommoditeitsvleisreus Tyson aangekondig hy gaan ses aanlegte van die Brasiliaanse vleisverwerker BRF koop, onder meer in Asië en Brittanje, vir $340 miljoen (sowat R4 685 999 000).
Dit raak moeiliker om vleis as kommoditeit te verkoop, soos wat Tyson reeds jare lank doen. Weens hoër produksie in Amerika is pryse vir vark- en hoendervleis laer, en dis onwaarskynlik dat dié afwaartse neiging gaan verander. Amerikaners raak ook meer gesondheidsbewus en verlang meer plantproteïen weens die persepsie dat dit meer omgewingsvriendelik is.
Om by dié neigings in te val, wil Tyson hom meer op waardetoegevoegde produkte toespits, soos voorafgesnyde vleise en klaargemaakte kosse. Buiten aandele in maatskappye wat vegetariese vleisvervangende produkte maak, beloof die maatskappy om ook in komende weke nuwe, alternatiewe proteïenprodukte bekend te stel. — Bloomberg
2 BRITTANJE | Tinder vir jou koeie
’n Britse maatskappy se nuwe selfoontoepassing, Tudder, is soos Tinder vir beeste. Dit help beesboere om geskikte beeste op te spoor deur ’n platform te skep waar boere foto’s en ander besonderhede van hul beeste kan adverteer. As jy belang stel, trek jy jou vinger na regs oor jou selfoonskerm, en indien nie, na links, nes op Tinder.
Boere wat aandui dat hulle belang stel word dan outomaties herlei na die lewendehawehandelaar Hectare se lewendehawehandelwebwerf, waar hulle die eienaar kan kontak of ’n aanbod kan maak op ’n bees. Nagenoeg ’n derde van Britse boerderye gebruik Hectare se aanlyn platforms om in lewende hawe en graan handel te dryf, volgens die maatskappy se uitvoerende hoof, mnr. Doug Bairner. — Bloomberg
3 SUID-EUROPA | Sneeu bied uitkoms
Goeie winterreën en sneeu op die berge het daartoe bygedra dat veral die suidelike dele van Europa aansienlik beter daaraan toe is as in die ooreenstemmende tyd verlede jaar. Die afgelope twee jaar was van die moeilikste landboujare op dié vasteland.
“Teen verlede jaar hierdie tyd was ons damme almal amper leeg. Ons was nie seker hoe ons die somer in die Mediterreense gebiede in die suide sou oorleef nie. Teen die einde van die somer het dinge regtig sleg gelyk, maar nou is al ons damme darem weer vol. Ons is reg vir die somer,” sê mnr. Alberto Ojembarrena, ’n bemarkingshoof vir Corteva in Spanje. — Jasper Raats