INMAAKBEDRYF BLY ‘IN ’N BLIK GEDRUK’
‘Helaas, beter dae ontwyk ons.’
VAN die inmaakvrugtebedryf se hoop om ’n U-draai te maak en die afgelope drie jaar se krimpende oeste om te keer, het dadels gekom. Die appelkoosoes was die swakste in drie dekades en die vooruitsigte vir taaipitperskes en inmaakpere lyk ook droewig.
“Met die droogte, die laer vrugtepryse, onsekerheid oor langtermynkontrakte en die wisselvallige, sterk rand, bly die bedryf in ’n blik gedruk,” skryf mnr. Wiehahn Victor, uitvoerende hoof van die Inmaakvrugteprodusentevereniging (IPV), in die jongste uitgawe van Die Krat.
“Daar was soveel hoop dat die bedryf deur die drif is ná goeie reënval in sommige gebiede, asook die verswakking van die rand laat verlede jaar, maar helaas, beter dae ontwyk ons.”
SWAKSTE OES IN 30 JAAR
Die appelkoosoes was vanjaar die swakste in meer as 30 jaar, en het slegs 24 636 ton beloop. “Dit is 13,7% swakker as verlede jaar se rampspoedige droogte-oes van 28 539 ton. Hoewel ’n swak oes verwag is, is die werklike inname ook 8% laer as die skatting.” Sowat 15 jaar gelede (in die 2003-’04seisoen) het die bedryf bykans 61 000 ton appelkose gepluk.
GEHALTE
Ietwat minder appelkose is ook as graad een-inmaakvrugte geklassifiseer as verlede jaar. “Die oordrageffek van die droogte, en in sommige gevalle brak water (as gevolg van watertekorte), het veroorsaak dat die appelkose relatief klein gebly het. Die houvermoë was wisselvallig, maar gelukkig kon die fabrieke die oes vinnig verwerk.”
Volgens hom was inmaakfabrieke vir bykans tien dae gesluit nadat die appelkoosverwerking vroeg tot ’n einde gekom het, voordat die perske-oes afgeskop het.
Victor sê ’n normale perske-oes beloop sowat 165 000 ton, maar na raming sal net 138 000 ton vanjaar gepluk word. Dis ongeveer 4 000 ton minder as die vorige seisoen.
“Dieselfde neiging geld vir Bon Chrétien-pere, waar die geskatte oes afwaarts aangepas is tot 90 000 ton, teenoor ’n langtermyngemiddelde van 105 000 ton.” Die oesverwagting stem ooreen met verlede jaar se oes van altesaam 89 823 ton.