PREMIEPRYS VIR VSA MIELIEPROJEK
Die projek van die Indiaanse Pawnee-stam in Amerika om die saad van hul antieke mieliekultivar te vermeerder, maak goeie vordering. Hulle verkoop deesdae die meel van hul arendmielie (eagle corn) teen eksklusiewe pryse, onder meer $15 vir ’n sak met ses koppies meel in. Dit kom neer op sowat R210 vir ’n sak met 840 g mieliemeel.
Dit geskied onder die vaandel van die Pawnee-saadbewaringsprojek.
Die Pawnee, wat deur baie as Amerika se eerste sogenoemde mielieafmakers (cornhuskers) beskou word, en vir wie arendmielies sowat 600 jaar lank ’n stapelvoedsel was, is in die 1870’s deur die regering gedwing om van hul eeue oue tradisionele woongebied in Nebraska na Oklahoma te trek. Dit was deel van wat in die volksmond bekend staan as die trail of tears-projek om plek te maak vir wit pionierboere.
In Nebraska het die Pawnee-vroue in daardie stadium glo tien mieliekultivars, agt soorte bone, en sewe soorte pampoen verbou en daarmee gekook. Die arendmielie was hul groot staatmaker. Die verskillende mieliekultivars het in kleur van swart tot oranje gewissel.
Die arendmielie is ’n soort wit mielie wat ’n bloupers kol op elke pit ontwikkel namate die pitte vol raak. Dié kol verander mettertyd sodat dit soos ’n arend met uitgespreide vlerke lyk.
Met die trek van Nebraska na Oklahoma het die Pawnee glo sowat vyftig pitte in ’n houer saamgeneem, maar die paar wat hulle aanvanklik probeer saai het, wou nie in Oklahoma groei nie.
Teen 2004 is die laaste 25 arendmieliepitte in Oklahoma gesaai, en dié keer was dit ’n sukses. Die boerdery het nou só uitgebrei dat die Pawnee weer genoeg stroop om ’n tradisionele mieliesop daarvan te maak, en meel te maal wat hulle teen ’n premieprys van die hand sit. — MARLEEN SMITH BESOEK ook die Facebook-blad Pawnee Seed Preservation Project.