WAT IS MORINGA?
Moringa is ’n vinnig groeiende, bladwisselende boom wat 10-12 m hoog kan word. Die bome groei van saad af. In warm weer ontkiem sade binne sowat tien dae, en as dit koeler is, kan dit tot 18 dae duur.
In optimale toestande bot die boom binne ses maande nadat dit geplant is vir die eerste keer. Dit dra dan saad in lang, boontjieagtige peule.
Moringa is taamlik bestand teen droogte, maar vir kommersiële verbouing moet dit liefs besproei word. Die blare is die voedsaamste deel van die plant en is ’n noemenswaardige bron van vitamien B, vitamien C, provitamien A, vitamien K en proteïene.
Moringa oleifera is die algemeenste soort. Dit groei vinnig in tropiese en subtropiese klimaatstreke en is gehard teen droogte. Dit kom oorspronklik uit die suide van Asië, waar die saadpeule en blare as voedsel en tradisionele medisyne gebruik word. Dit word ook gebruik om water te suiwer.
Indië is die wêreld se grootste moringaprodusent
en lewer sowat 1,2 miljoen ton saadpeule per jaar.
In die suide van Asië word die saadpeule gekook en in kerrie gebruik. Selfs in gekookte vorm is die peule ryk aan vitamien C.
In sommige gemeenskappe word die blare soos spinasie gekook. Ander mense droog en maal dit om as poeier in soppe en bredies te gebruik. In die Westerse wêreld word dit as kapsules geneem vir gesondheidsvoordele.
Die sade word soms uit die peule verwyder en soos tafelertjies geëet of soos neute gerooster. Volwasse sade is ryk aan olie wat in kos en skoonheids- of velsorgmiddels gebruik kan word. Die oliekoek kan vir bemesting gebruik word of as uitvlokmiddel om water te suiwer.
■ Die Amerikaanse departement van gesondheid se nasionale gesondheidsinstituut hou ’n omvattende databasis van mediese navorsingsverslae van mediese instellings reg oor die wêreld oor moringa se medisinale waarde. Hierdie verslae is beskikbaar op die webwerf van die Amerikaanse mediese biblioteek (www.ncbi.nlm.nih.gov/pubmed).