HERLAAI BATTERYE ENIGE TYD, ENIGE PLEK
Toe dr. Theo de Jager, voorsitter van die Wêreldboere-organisasie, op ’n dag vir mnr. Samson Ratabala, sy regterhand op die plaas, vra hoekom hy vir iemand anders boer en nie vir homself nie, het Samson dadelik geantwoord: “Ek is nie so goed met die telefoonwerk nie.”
Samson het toe al besef ’n boer se selfoon is een van die belangrikste stukke gereedskap in sy boerdery. Terwyl tieners dalk fone verkies met speletjies, toegang tot sosiale media en die vermoë om die beste selfies te neem, het boere meer praktiese vereistes – opvangs en batteryleeftyd.
Wat batteryleeftyd betref, bied Anker, ’n Amerikaanse elektronikamaatskappy, ’n hele klomp oplossings wat ’n boer se lewe kan vergemaklik.
Daar is byvoorbeeld die Anker PowerCore 26800 mAh, ’n eksterne batterylaaier wat jou Samsung S9, Huawei P20 Pro of iPhone 7 tot ses keer kan laai sonder dat jy naby ’n kragsok kom. Hierdie kragbank het drie USB-sokke en kan dus drie toestelle gelyktydig laai. Wanneer jy vanaand by die huis kom, kan dit weer binne ses uur volgelaai word indien jy ál die beskikbare energie deur die dag getap het.
Saam met die PowerCore 26800 kry jy twee mikro-USB-kabels en ’n netjiese bêresakkie. Let op dat ’n mens dit nie kan gebruik om toestelle te laai wat ’n inset van minder as 50 mA verg nie, soos sommige Bluetooth-oorfone en GPS-toestelle. PRYS: R1 349.
NAVRAE: Webwerf: www.shopandship.co.za