PRYSE BLY STERK GROEI
Die Bosvelderram Klipdrift (op die foto bo) het die hoogste prys op vanjaar se Bosvelderveiling op Bela-Bela behaal. Mnr. Morris Ramatlakala van Hammanskraal het R34 500 vir dié ram van mnr. Theo Hoffman van Loskopdam betaal, sê me. Rudette Nel, voorsitter van die Bosvelderstudiegroep, voorheen bekend as die Limpopo-Pedi-enBosvelderstudiegroep.
Dit is meer as dubbel verlede jaar se topprys van R16 500, ook vir ’n ram van Hoffman.
Ramatlakala en Hoffman was onderskeidelik ook die koper en verkoper van die dragtige ooi wat die hoogste prys behaal het, naamlik R8 100.
Die studiegroep het die veiling soos vorige jare by die Bela-Belakleinveesentrum in Limpopo aangebied.
Bosvelder- én Pedi-/Bapediskape het onder die hamer gekom, waarvan sowat twee derdes Bosvelders was. Die Bosvelder is ’n veredelde Pediskaap.
Al 184 diere wat aangebied is, is verkoop, met ’n gesamentlike omset van R1 128 450 (gemiddeld R6 133 stuk), vergeleke met 2018 se omset van R628 050 vir 157 diere (gemiddeld R4 000 stuk).
Altesame 18 Bosvelderramme en 116 Bosvelderooie is vanjaar aangebied. Die ooie het gemiddeld R5 088 stuk behaal en die ramme gemiddeld R16 534, vergeleke met onderskeidelik R4 066 en R10 705.
Nel sê dat daar al ’n hele paar Bosvelderkuddes is wat elkeen sowat 1 000 ooie groot is en dat daar reeds suksesvol op kommersiële vlak met die ras geboer word.