Swartvlek: Geen lig in SA tonnel

MET die sitrusseisoen op hande is daar steeds geen vooruitsig dat Suid-Afrikaanse produsente verlos kan word van die peperduur stappe om die moontlike verspreiding van swartvlek na die Europese Unie (EU) te voorkom nie.

Mnr. Deon Joubert, die SuidAfrikaanse Sitruskwekersvereniging (SKV) se gesant vir handelsbetrekkinge met die EU, het dié slegte nuus pas op die Fruit Logistica-handelskou in Berlyn, Duitsland, aan Suid-Afrikaners oorgedra.

Joubert sê hoewel daar verlede jaar net twee onderskeppings van vrugte met tekens van die swartvlekswam was, het die SKV se pleidooie vir vrystelling van SuidAfrikaanse sitrus uit swartvlekgebiede op dowe ore geval.

“Ons eerste strategie was om te versoek dat daar ’n uitsondering gemaak word, soos vir vrugte wat tot sap verwerk word. Die versappingsaanleg vernietig mos die swam.

“Toe dit nie werk nie, het ons weer daarop gewys dat ’n dooie swam geen risiko inhou nie. Ons het gevra dat onderskeppings van vrugte waarop daar tekens van ’n dooie swam gevind word, nie as onderskepping sal tel nie.”

Albei voorstelle is verwerp. Met die twee onderskeppings verlede jaar is dooie swamme op vrugte waargeneem.

TEEN IMMIGRASIE

Die SKV het daarom besluit om op alle ander fronte te veg vir sy lede. Een strategie is om dit onder Europeërs se aandag te bring dat die Suid-Afrikaanse sitrusbedryf 10 000 werksgeleenthede skep.

Europese ekonomieë is tans onder groot druk om in die behoeftes van miljoene vlugtelinge uit die Midde-Ooste en Afrika te voorsien. Die EU het onderneem om ’n miljoen werksgeleenthede in Afrika te help skep in ’n poging om Afrikane in Afrika te laat bly.

“Ons is deel van die oplossing, en dit maak nie sin om ’n bedryf soos ons s’n te straf as dit nóg mense in Afrika se werksgeleenthede in gedrang bring nie,” sê Joubert.

GEEN BEDREIGING

Dit is reeds wetenskaplik bewys dat swartvlek geen bedreiging vir sitrus in Mediterreense gebiede soos Spanje inhou nie. Spanje is die grootste teenstander van SuidAfrikaanse sitrus in die EU.

Dit kos die Suid-Afrikaanse sitrusbedryf R1,8 miljard per jaar om te voldoen aan maatreëls om die verspreiding van swartvlek na die EU te bekamp.