SA KULTIVARS HET POTENSIAAL
Met die regte omstandighede, soos hoë reënval, lang dae en vrugbare grond, behaal Suid-Afrikaanse koringkultivars maklik 7 t/ha.
Dr. Francois Koekemoer, navorsingsdirekteur by die saadteelmaatskappy Sensako, sê proefnemings wat saadmaatskappye in Brittanje en Frankryk met plaaslik geteelde kultivars gedoen het, toon dat Sensakokultivars soos SST88, SST875, SST027 en SST087 bykans dieselfde opbrengste behaal as Tybalt en Willow, die broodkoringkultivars wat die algemeenste in Brittanje aangeplant word (sien GRAFIEK ).
Koekemoer sê dié opbrengste is moontlik omdat koring in Europa gemiddeld 90 dae meer tyd as in Suid-Afrika het om die oeskomponent te ontwikkel. Daarbenewens geld ’n gunstige klimaat gewoonlik tydens alle ontwikkelingsfases sodat meer are per plant, meer korrels per aar en meer korrels per vierkante meter gevorm word. Daar is ook ’n goeie vloei van assimilate na die are, en groter en swaarder korrels word vanweë die lang korrelvultyd behaal ( TABEL 4 ).
Sensako het ook saad van die kultivar waarmee onlangs rekordopbrengste van meer as 16 t/ha in Nieu-Seeland en Engeland behaal is, in die Wes-Kaap getoets, maar die koring het nooit verder as die vegetatiewe fase gevorder nie. Koekemoer sê dit sal hier net goed wees vir weiding.