BRANDPAAIE EN DIE REG
Hoe beskerm ek myself teen hofsake rondom brandpaaie?
Die Nasionale Wet op Veld- en Bosbrande (Wet 101 van 1998, bekend as die Brandwet) bepaal dat indien jy lid van die plaaslike brandvereniging is, die brandvereniging ’n plan vir brandstroke kan opstel en dit deur die Minister van Landbou, Bosbou en Visserye kan laat goedkeur. In so ’n geval hoef net daardie spesifieke gebiede ingevolge die brandplan gebrand te word. As ’n brand op jou grond ontstaan en jy aan ’n brandvereniging behoort, word jy ingevolge die wet onskuldig geag, tensy jy deur ’n hof skuldig bevind word.
Iemand wat nie lid van die plaaslike brandvereniging is nie, moet op sy/haar plaas voorbrande maak. Indien ’n brand op jou plaas sou ontstaan en skade aan ander eiendomme aanrig, word jy skuldig geag totdat jy jou onskuld in ’n hof bewys.
Indien jy brandpaaie gemaak het, behoort jy te kan bewys dat jy soos ’n redelike mens opgetree het en nie vir ander grondeienaars se skade aanspreeklik sal wees weens die brand nie.
Wanneer ’n brand op jou grond kan ontstaan, of van jou grond af kan versprei, moet jy brandpaaie maak en dit in stand hou. Dit is die verpligting wat die wet eienaars oplê en wat hulle moet nakom om nie deur omliggende eienaars aanspreeklik gehou te word vir skade nie.
Brandpaaie wat langs ’n deurgangspad ge- maak is, vrywaar jou van aanspreeklikheid vir skade aan naburige eiendomme indien ’n brand wat vanaf die skouer van die pad ontstaan, oor jou grond sou trek. Dit sou wel onnodig wees in ’n geval waar ’n brandplan deur die plaaslike brandvereniging opgestel is wat aandui dat brandpaaie nie weerskante van die betrokke pad gemaak hoef te word nie. Mnr. Butch van Blerk is direkteur van Bill Tolken Hendrikse Ingelyf van Bellville, Kaapstad.