Hoër salarisse vir plaaswerkers
Plaaswerkers in Namibië het die afgelope twee jaar gemiddeld byna dubbel die minimum loon verdien, volgens die jongste opname oor die vergoeding van werkers op kommersiële plase.
Elke twee jaar word ’n opname oor plaaswerkers se vergoeding op kommersiële plase deur die Landbouwerkgewersvereniging, ’n filiaal van die Namibiese Landbou-unie, gedoen.
Die jongste verslag oor die tydperk 2017-’18 is pas bekend gemaak. Inligting van 3 288 werkers is dié keer gebruik. Boere se deelname is vrywillig.
Die gemiddelde maandelikse basiese salaris van heeltydse werkers beloop R2 138, byvoordele uitgesluit. Die totale vergoedingspakket beloop gemiddeld R3 413. Dit bestaan uit ’n kontantsalaris, kontanttoelaag, rantsoene en ander kos wat op die plaas geproduseer word (wat die basiese vergoeding uitmaak), asook huisvesting, weiding vir vee en gratis vervoer.
Die maandelikse vergoeding sluit nie bonusse, klere, medisyne, skool- en koshuisgeld, bydraes tot ’n maatskaplike voorsorgfonds en water en energiekoste (hout en elektrisiteit) in nie.
Dit is dus ’n bykomende koste vir die werkgewer en deel van die werker se voordele.
GRAFIEK 1 toon hoe die vergoeding die afgelope jare gestyg het.
GRAFIEK 2 toon die persentasie wat die verskillende vorms van vergoeding uitmaak.
Ingevolge ’n ooreenkoms tussen die verskillende landbou-unies in Namibië oor die minimum loon, wat onder meer vir gratis huisvesting, ’n kontantloon en voedseltoelaag/ gratis rantsoene of die plant van gewasse of aanhou van vee voorsiening maak, is die minimum kontantloon tans R4,62 per uur.
Luidens die nuutste verslag het ongeskoolde plaaswerkers in 2017-’18 egter gemiddeld R8,20 per uur verdien.
Die eerste opname is in 1998 van stapel gestuur met die doel om betroubare statistieke oor werkers in die kommersiële landbousektor beskikbaar te stel.