HENNEP: KOMMERSIËLE PROEWE BEOOG
Hennep het groot potensiaal om ’n nisproduk vir klein- én kommersiële boere in Suid-Afrika te wees, sê mnr. Kwena Makgohloa, navorser van die Landbounavorsingsraad (LNR) se Instituut vir Nywerheidsgewasse.
Die instituut doen al langer as 20 jaar lank navorsing oor dié gewas, ’n familielid van dagga en ook bekend as “kommersiële dagga”, wat tans net met ’n permit gekweek mag word.
Die registrasieproses vir die LNR se twee nywerheidslyne – SA Hemp1 en SA Hemp2 – sal hopelik einde vanjaar afgehandel wees.
Makgohloa sê die instituut onderhandel nou met kommersiële boere om proewe op kommersiële skaal te doen, wat na verwagting oor meer as een jaar sal strek.
“Finansiering gaan ’n groot rol speel om ons in staat te stel om die kommersiële navorsing te doen. Ons het ook ’n permit (van die reguleringsowerheid vir gesondheidsprodukte) nodig.”
Makgohloa sê wanneer boere hennep op kommersiële skaal kan begin verbou, sal die kapitaaluitgawe wat nodig is, van die eindgebruik afhang. “As ’n mens dit wil verbou vir medisinale produkte, wat aan farmaseutiese vereistes moet voldoen, sal jy in ’n kweekhuis moet belê wat beheerde toestande verseker. Dít sal kapitaalintensief wees.”
Makgohloa sê hennep kan op droëland verbou word, maar vir maksimum opbrengs is besproeiing nodig. Moontlike markte vir die produk sluit veral die farmaseutiese bedryf in, asook die motor- en tekstielbedryf. Makgohloa sê daar is reeds maatskappye in Suid-Afrika met aanlegte wat aan die vereistes vir goeie vervaardigingspraktyk (GMP) vir farmaseutiese produkte voldoen.