VERKOPE GETUIG VAN MOEDELOSE GRAANSEKTOR
Ná maande se taamlik goeie verkope was trekkerverkope in Januarie 29% laer as die 546 eenhede wat verlede Januarie verkoop is, sê die Suid-Afrikaanse Landboumasjinerie-assosiasie (Salma) in sy nuutste verslag oor werktuigverkope. In die
12 opeenvolgende maande was trekkerverkope effens (0,4%) laer as in die vorige ooreenstemmende tydperk.
Die stroperverkope van vier eenhede in Januarie was ook aansienlik minder as die agt eenhede wat verlede Januarie verkoop is. In die opeenvolgende 12 maande was stroperverkope egter steeds byna 6% meer as in die vorige jaar.
Die teleurstellende verkope in Januarie weerspieël waarskynlik ’n mate van pessimisme in die mark. Sekere somergewasgebiede, veral in die westelike dele, het nie reën gehad nie, en waar reën wel geval het, was dit baie laat, sê mnr. Greg Cadman, voorsitter van Salma.
Dit het dit vir sekere boere onmoontlik gemaak om te plant, of dit het boere gedwing om na gewasse met ’n korter groeityd, soos sonneblomme of graansorghum, oor te skakel. Verlede maand is gesê dat dit nog te vroeg is om ramings te maak vir die 2019-kalenderjaar.
“Voorlopige ramings van mielie-aanplanting deur die Nasionale Oesskattingskomitee dui daarop dat minder mielies aangeplant is, maar nie soveel minder as wat sekere ontleders gedink het nie. Die mielie-oes sal die bepalende faktor wees vir die verkope van toerusting gedurende die eerste helfte van die 2019-boekjaar,” sê Cadman.