Organiese sertifisering groot probleem vir SA boere
DIE geleentheid om munt te slaan uit die uitvoer van organiese produkte na markte in die Europese Unie (EU) is groot, maar Suid-Afrikaanse boere sal hul sokkies moet optrek en hul sake agtermekaar moet kry as hulle toegang daartoe wil verkry.
Geleenthede wat dié mark bied, asook die vereistes om deel daarvan te word, is onlangs deur opkomende boere en ander belanghebbendes bespreek op ’n werksessie van die African Farmers’ Association (Afasa).
Europese verbruikers se voorkeur vir organiese landbouprodukte wat op ’n volhoubare manier verbou word, is een van die grootste internasionale neigings in die varsproduktebedryf. Dit is ook tydens die werksessie gestel as die grootste dryfveer agter die hoë standaarde wat van vervaardigers verwag word wanneer hulle produkte na die EU wil uitvoer.
STAAN SAAM
Daar heers egter groot frustrasie onder opkomende boere om aan EU-standaarde te voldoen, die sertifiseringsproses te voltooi en die koste daaraan verbonde te delg.
Dr. Pieter Prinsloo, voorsitter van Agri SA se kommoditeitskamer, het gesê groot verwarring heers onder opkomende boere wat organiese sertifisering betref, die jaarlikse oudits wat gedoen moet word, en die duplisering van standaarde wat onnodige koste tot gevolg het.
Outreach South Africa, ’n inisiatief wat inligting verskaf oor die vereistes en voordele van die handelsooreenkoms tussen die Suider-Afrikaanse Ontwikkelingsgemeenskap en die EU, stel voor dat hulpmiddels aan boereverenigings, belanghebbendes in die private sektor, asook die Regering beskikbaar gestel word sodat hulle opkomende boere met die sertifiseringsproses kan help.
GOEDKOPER
Mnr. Antoine Faure van Ecocert, ’n sertifiseringsagentskap wat in meer as 130 lande wêreldwyd werksaam is, sê prosesse is reeds van stapel gestuur om die sertifiseringsproses meer bekostigbaar te maak.
Hy waarsku egter die proses gaan meer gekompliseerd raak namate die plaaslike mark vir organiese produkte ontwikkel, omdat daar verskillende etikettering vir die onderskeie markte sal moet wees.
Die grootste kwelpunt, luidens navorsing deur Outreach South Africa, is dat organiese produkte nie deurlopend geproduseer word nie. Hoewel organiese produkte in Suid-Afrika beskikbaar is, is die aanbod wisselvallig en nie groot genoeg om in die vraag daarna te voorsien nie. Die gebrek aan regulasies rondom die etikettering van produkte wat as “organies” bemark word, asook die hoë standaarde waaraan die produkte moet voldoen, is nog ’n probleem.
—