Grondeise sal miljarde kos om af te handel
‘Hy sal altesaam 31,9% van sy begroting bestee om die 1 732 eise af te handel.’
DIE Regering reken R10,5 miljard is genoeg om die oorblywende 1 732 restitusie-eise in die komende drie jaar af te handel.
Die Departement van Landelike Ontwikkeling en Grondhervorming wil hom toespits op die herstel van grondregte, die versnelling van grondhervorming, die transformasie van grondbesit, die skep van werkgeleenthede en die verbetering van bedryfsvermoë.
departement is ’n begroting van R10,9 miljard vir 2019-’20 toegestaan, waarvan R2,9 miljard vir grondhervorming begroot is, R3,6 miljard vir restitusie en R1,8 miljard vir landelike ontwikkeling.
Oor die mediumtermyn-begrotingstydperk (wat oor drie jaar strek) is die departement se totale begroting R33 miljard. Dit beteken hy sal altesaam 31,9% (of R10,5 miljard) van sy begroting bestee om die 1 732 eise af te handel.
Die vasstelling van die geldigheid van grondeise verg baie navorsing en word hoofsaaklik deur konsultante gedoen. Na raming sal altesaam R343,2 miljoen oor dié tydperk aan konsultante bestee word. Om sy reikwydte rakende restitusie te verbeter, sal die departement ’n omvattende kommunikasiestra-
tegie van stapel stuur, wat op mediumtermyn R37,9 miljoen sal kos.
HERVERDELING
Die departement wil in die volgende drie jaar sowat 269 539 ha strategies geleë grond bekom en het R3,5 miljard vir die aankoop van dié grond toegewys. Hierdie besteding kom vanuit die grondhervormingsprogram, wat na verwagting 25,5%, of R8,3 miljard, van die departement se totale besteding oor dié tydperk sal uitmaak. Ingesluit by dié bedrag is R445 miljoen vir grondwaardasies deur die kantoor van die grondwaardeerder-generaal.