LIMPOPO-WAGYUVEILING LOK TALLE ‘VERSIGTIGE KOPERS’
DIE eerste Wagyuveiling in Limpopo het dalk nie vir die wegholpryse van vyf jaar gelede se wildveilings gesorg nie, maar dit het gewys dat daar gesonde belangstelling in dié ras is en dat boere tog bereid is om hul hande taamlik diep in hul sakke vir hierdie vleisbeeste te steek.
’n Vier maande oue, rasegte Wagyuvers het R400 000 behaal. Sy is saam met ’n Bonsmara-kruiskoei verkoop wat die bevrugte embrio van twee top- uit Japan dra. ’n Swart Wagyubul van 18 maande oud het R350 000 behaal.
Die omset van die veiling, waarop 50 lotte onder die hamer gekom het, was R5,5 miljoen.
Mnr. Andries Schutte van Platinum Beef, wat die spogveiling by Castle de Wildt aangebied het, sê daar was definitief winskopies. Hy twyfel of boere in Limpopo weer sulke goeie teelmateriaal teen soortgelyke pryse sal kry.
‘WILDBORREL’
“Ek is nietemin baie tevrede. Daar was ’n klomp versigtige kopers en ’n mens kon sien baie van hulle is bang vir nog ’n ‘wildborrel’. Tog getuig die stampvol saal en die stewige pryse wat betaal is, van ’n gesonde belangstelling in die Wagyu.”
Hoewel Schutte begrip het vir die vrese dat die Wagyumark oorversadig kan raak soos wat die afgelope twee jaar met verskeie skaars wildsoorte gebeur het, is hy nie bekommerd daaroor nie. “Onthou, ons praat hier van beesvleis, ’n produk met ’n goed gevestigde verbruikersmark. Suid-Afrika kan in hierdie stadium nie eens in die plaaslike vraag voorsien nie, wat nog te sê van die uitvoermark.”
Hy sê ’n Suid-Afrikaanse kettingwinkelgroep wat hom op produkte van ’n hoë gehalte toelê, het reeds aangedui dat hy teen einde 2020 ’n bestendige lewering van 200 000 Wagyukarkasse per jaar wil hê. Die hele Suid-Afrikaanse Wagyubedryf lewer tans maar 5 000 karkasse per jaar.
Schutte glo ook die Wagyu gaan altyd ’n nismarkproduk wees. Selfs in Amerika en Australië, waar al 30 jaar met die ras geboer word, oorskry die vraag steeds die aanbod – veral op daardie lande se uitvoermarkte.
Die huidige verbod op Suid-Afrikaanse vleisuitvoer weens bek-en-klouseer beteken dat daar nie nou Wagyuvleis na die Midde-Ooste uitgevoer kan word nie, maar Schutte sê daar is reeds ’n bestaande mark met ’n gesonde vraag na Suid-Afrikaanse Wagyuvleis in dié streek.
—