NUWE BRANDSTOFTEGNOLOGIE DOELTREFFEND ÉN MOOI
New Holland se metaanaangedrewe konseptrekker, wat in 2017 bekend gestel is, het verlede jaar die gesogte Good Design-eerbewys vir 2018 van die Chicago Athenaeum se museum vir argitektuur en ontwerp in Amerika en die Europese sentrum vir argitektuur, kunsontwerp en stedelike studies ontvang. Die trekker is deur ’n paneel bedryfspesialiste, ontwerpjoernaliste en kritici as hul topontwerp gekies vir dié gesogte prys uit aansoeke van die wêreld se topvervaardigers en bedryfs- en grafiese ontwerp-instellings van 47 lande.
Die eerbewys word gegee aan die vernuwendste en nuutste nywerheids- en grafiese ontwerpe. Die kriteria behels die gehalte van ontwerp in die hoogste vorm, funksie en estetika-standaard buite die gewone verbruikersgoedere en grafika.
Dié metaanaagedrewe konseptrekker is ontwerp om ’n nuwe aanslag tot trekkers te gee, met die kap, voorkant en agterste modderskerms en brandstoftenk wat ’n vloeiende, stylvolle voorkoms het. Die bestuurder het ’n uitsig van 360 grade en die vensterarea is 20% groter. Die swaaiglaskoepeldak, met ’n geïntegreerde presisiebestuurontvanger, bied ook die eerste volledige panoramiese ontwerp, iets nuuts vir die landbou.
Die trekker gebruik doeltreffende verbrandingstegnologie wat ontwerp is vir een van CNH se handelsmerke, FPT Industrial, se natuurlike gas-trekkragtegnologie. Dié sessilinder-NEFmetaanenjin lewer dieselfde krag en wringkrag as sy diesel-eweknie, maar bespaar 30% in loopkoste en maak ongeveer 50% minder geraas. In werkstoestande laat die trekker 10% minder koolsuurgas vry, en die algehele uitlatingsis80%minderassydiesel-eweknie.
Daarby kan plaasprodukte, soos graanreste en ander produksie-afval, gebruik word om biometaan te vervaardig, wat koolstofvrylatings byna ten volle uitskakel.
Die trekker skakel in by New Holland se toekomsiening van volhoubare produksie omdat dit aangedryf sal word deur energie wat van die grond en afvalprodukte vervaardig word.
— FREDALETTE UYS