WAT SÊ DIE BOERE?
Landbouweekblad het by die Al3 Boerdery, een van mnr. Max van Heerden van Dragonfruit SA se groot klante, gaan hoor hoe dit met hul aanplantings en die bemarking van hierdie betreklik nuwe gewas gaan.
Volgens mnr. CT van der Merwe (regs) van die Al3 Boerdery is hulle baie opgewonde oor die draakvrug, veral die soet kultivars wat ’n suikerinhoud van 16 °Brix en hoër het (hoër as dié van appels en perskes). “Buiten die heerlike smaak, die feit dat dit makliker as ’n nartjie skil en seker die gesondste vrug is wat jy kan eet, is daar een baie groot voordeel waaroor niemand praat nie.
“Dit verg ongelooflik min water. Die volume water per kilogram vrugte is byna die helfte van dié van sitrus of avokado’s. Ons het nog nie 100% akkurate syfers nie, maar ons het vinnig besef dit is nie soos aartappels of uie natlei nie. Selfs in ’n warm en droë gebied, soos Waterpoort, kan jy draakvrugte maklik versuip. Daarom is dit een van die natuurvriendelikste vrugte wat ons kan verbou. Dit het ’n baie lae koolstofspoor per kilogram vrugte. “Die enigste nadeel is dat mense dit nog nie ken nie. Die mense wat dit wel ken, ken die ou, smaaklose kultivars wat die vrug se naam baie skade berokken het. Daarom is ons as Al3 saam met ’n aantal produsente en een van die vier groot kettingwinkelgroepe besig om met ’n bewusmakingsveldtog te begin. Dit sal moontlik eers in November van stapel gestuur word, aangesien die 2018-’19-produksiejaar einde se kant toe staan. Indien enige produsente wat van die soet kultivars het, by die bewusmakingsveldtog wil inskakel, is hulle welkom om ons bemarkingsafdeling te kontak.” Al3 is besig met waardetoegevoegde produkte. “Ons het al Dragon Fruit Gin gemaak saam met die boetiekjenewervervaardiger Rhino Beetle Gin, wat dit moontlik by sy reeks spesialiteitsjenewers sal voeg. Ons oorweeg ook gedroogde draakvrug saam met die maatskappy Levubu Dried Fruit. Albei opsies lyk belowend en ons is baie opgewonde daaroor.”
NAVRAE: Mnr. Johann Jordaan, e-pos: johannj@al3.co.za; sel 083 232 6314.