Een plaatkoek, baie planne
’n Eenvoudige plaatkoek kan in ’n japtrap in ’n verskeidenheid lekkernye omtower word met die hulp van ’n vinnige stroop of ’n maklike vulsel.
Sny die plaatkoek in die lengte deur en smeer konfyt op die een helfte. Sit die ander helfte bo-op en sny dan die laagkoek in groterige vingers. Klits die eiers, room, melk en vanieljegeursel saam. Week die koekvingers goed in die eiermengsel. Verhit ’n stukkie botter in ’n pan oor matige hitte en braai die geweekte koekvingers daarin tot goudbruin aan alle kante en deurgaar. Sit louwarm voor met versiersuiker oor gesif. Lewer 30 vingers.
Ystervarkies
Met ’n vars ystervarkie, of lamington, kan jy my in ’n wip vang. Maar as jy dit probeer maak met koek wat pas gebak is, gaan jy met ’n hoop krummels sit. Sny die koek in vierkante en laat staan dit vir ’n paar uur sodat die buitekant net effens droog kan word vóór jy die koekblokkies in die sjokoladestroop doop. Die heel beste plan is om die koek ’n dag of twee vooraf te bak. 1 plaatkoek
Sjokoladestroop
750 ml suiker 60 ml kakao, gesif 30 ml botter 375 ml kookwater
1 pak (500 g) fyn klapper
Sny die plaatkoek in eweredige blokkies. Verhit die suiker, kakao, botter en water oor lae hitte. Roer aanhoudend tot die suiker gesmelt is. Verhit tot kookpunt en laat kook vir 3-4 minute. Giet die stroop in ’n vlak bak. Doop die koekblokkies vinnig aan elke kant in die stroop en rol dan in die klapper. Pak op ’n draadrak om tot kamertemperatuur af te koel. Bêre in ’n lugdigte houer, maar eet binne 3 dae op. Lewer 30 ystervarkies, na gelang van hoe groot die blokke gesny is.
Koffiekaramelplaatkoek
Hierdie dekadente koek laat my sommer nostalgies voel. Kleintyd het my ma dit graag gemaak wanneer my pa verjaar het. Die resep wat sy gebruik het, vorm ’n dun koeklagie onderin die bak, wat dan met koffiestroop deurdrenk word. Ek verkies om dit met ’n plaatkoek te maak sodat die gekookte kondensmelk lekker diep in die gaatjies kan inloop.
1 plaatkoek
Koffiestroop
180 ml suiker 45 ml brandewyn 375 ml water 5 ml vanieljegeursel 30 ml sterk kitskoffiepoeier
Bolaag
1 blik (385 g) gekookte kondensmelk of karamelkondensmelk 500 ml room
30 ml versiersuiker Skeut koffielikeur (opsioneel) 80 ml gerasperde sjokolade, om oor te sprinkel
Maak die koffiestroop terwyl die plaatkoek effens afkoel in die oondpan: Verhit ál die bestanddele saam oor lae hitte, tot dit kookpunt bereik. Prut vir 5 minute.
Gebruik die steel van ’n houtlepel en druk gaatjies daarmee in die koek, ongeveer 3 cm uitmekaar, oor die hele oppervlak van die koek. Skep die warm koffiestroop oor die koek en laat dit goed intrek. Laat die koek tot kamertemperatuur afkoel.
Klop die gekookte kondensmelk tot glad. Skep lepels vol daarvan oor die hele oppervlak van die koek en smeer dit versigtig sodat die karamel in die gaatjies wat jy gemaak het, inloop. Klop die room saam met die versiersuiker en koffielikeur tot sagte punte vorm. Skep op die koek en versprei egalig. Sprinkel gerasperde sjokolade oor en verkoel die koek tot benodig. Lewer 20 porsies.
Lemoenstroopkoek
Dié lekker koek is perfek vir teetyd met ’n skep geklopte room daarby, of dis ’n heerlike winterpoeding met dik vla.
1 plaatkoek
Stroop
Fyngerasperde skil van 1 lemoen en 1 suurlemoen 375 ml vars uitgedrukte lemoensap 180 ml ligbruinsuiker 30 ml suurlemoensap 30 ml heuning
Sny die plaatkoek se kante af en sit die koek op ’n draadrak oor ’n skinkbord neer. Verhit die sitrusskil, lemoensap, suiker, suurlemoensap en heuning oor lae hitte, terwyl jy dit roer, tot die suiker gesmelt is. Verhit tot kookpunt en kook vir 8-10 minute. Prik die koek met ’n toetspen of vurk en skep lepels vol warm stroop oor die afgekoelde koek. Laat goed intrek en sny in porsies. Sit voor met geklopte room of vla. Lewer 20-25 porsies.
Kaneel-vlakoek
Hierdie heerlike koek kan met oorskietstukkies koek of plaatkoek gemaak word. Jy het nie ’n hele plaatkoek daarvoor nodig nie.
Ongeveer ’n halwe plaatkoek
Kaneelstroop
180 ml suiker 180 ml water 5 ml fyn kaneel
Vlavulsel
1 liter melk 180 ml mielieblom 1 blik kondensmelk 15 ml vanieljegeursel 1 eier, geklits
Smeer ’n middelslag-broodpan en voer dit met kleefplastiek uit sodat die rante van die plastiek oor die kante van die pan hang.
Sny die plaatkoek in snye van ongeveer 1 cm dik. Hou eenkant.
Verhit die suiker, water en kaneel saam oor lae hitte tot die suiker gesmelt is. Verhit verder tot kookpunt en kook vinnig vir 3-4 minute. Verwyder van die hitte en laat effens afkoel.
Vir die vlavulsel: Verhit die helfte van die melk tot net onder kookpunt. Klits intussen die res van die melk saam met die mielieblom en kondensmelk met ’n draadklitser tot glad. Voeg die warm melk by die kondensmelkmengsel en klits deur. Giet alles terug in die kastrol en verhit weer, terwyl geklits word, tot kookpunt. Prut vir ’n minuut of twee, terwyl jy liggies klits, en verwyder van die hitte. Roer die vanieljegeursel en geklitste eier by en klop goed.
Pak ’n laag van die koek onderin die broodpan. Skep ’n bietjie van die kaneelstroop oor (nie te veel nie, anders word die koek pap). Skep ’n lagie van die vlavulsel oor en smeer gelyk. Pak weer ’n laag koek op die vlavulsel, gevolg deur ’n bietjie kaneelstroop en ’n lagie vlavulsel. Herhaal die lae en eindig met ’n laag koek wat met kaneelstroop besprinkel is. Bedek met kleefplastiek en verkoel oornag. Keer uit en sit voor as nagereg of met teetyd. Lewer 8-10 porsies.
Blomkoekies
’n Oulike idee vir ’n kinderpartytjie, of as jy iets vir bakdag skool toe moet stuur. Die blommetjies in die eierdosies lyk soos plantjies in ’n kwekeryplanthouer.
1 plaatkoek Halwe pak (100 g) sjokoladekoekies, soos Romany Creams of Oreo’s 650 ml liggroen botterversiersel Helderkleurige lekkers, soos Smarties of M&M’s, om te versier
Sny die deksel van ’n kartoneierhouer af.Gebruik ’n klein skondrukker om ronde sirkels uit die plaatkoek te druk wat presies in die holtes van die eierhouer sal pas. Druk die sjokoladekoekies fyn of verwerk in ’n voedselverwerker tot krummelrig. Sprinkel ’n bietjie van die sjokolade-“grond” in elke holte van die eierhouer en pak ’n ronde stukkie plaatkoek bo-op. Spuit ’n draaisel liggroen botterversiersel op elke koekie en gebruik die lekkers om blommetjies te maak, soos op die foto. Een plaatkoek lewer ongeveer 24 blomkoekies.