OVK vier 100 jaar!
Die OVK-groep vier vanjaar sy honderdste bestaansjaar. Oor geslagte heen was OVK nie net ’n getroue boerderyvennoot vir landbouers én hul gesinne nie, maar ook ’n familielid.
Vroeg in 1919 het die Ficksburg Koöperatiewe Boerevereniging tot stand gekom. In die daaropvolgende jare het die Ladybrand Koöperatiewe Landbouw Vereniging (1920), die Clocolan Koöperasie (1929) en die Albert Koöperasie (1930) tot stand gekom. Hierdie koöperasies het hul kragte in 1993 saamgesnoer as OVK (Oos-Vrystaat Kaap Koöperasie).
Op 26 Februarie 1999 is die Oos-Vrystaat Kaap Beherend Beperk en Oos-Vrystaat Kaap Bedryf Beperk as maatskappye gestig, en op 1 Julie 2004 is die Karoo Oranje Landboukoöperasie (Hopetown-omgewing) by die maatskappy gevoeg. Op 1 September 2014 het die totale amalgamasie van CMW binne OVK plaasgevind.
BOERE SE AANDELE
Die maatskappye het oor die jare gegroei tot meer as 12 000 aandeelhouers. OVK bestaan uit finansieel lewensvatbare maatskappye en werk in verskeie landbougebiede, soos gewasse op droëland en onder besproeiing, natuurlike en aangeplante weiding, en groot- en kleinvee.
Die OVK-groep, een van SuidAfrika se suksesvolste landboumaatskappye, se hoofkantoor is op Ladybrand in die hartjie van die Vrystaat. Met feitlik 100% boere-aandeelhouding bedien dié maatskappye ’n gebied wat strek van Steynsrus in die noorde tot Willowmore in die suide, en van Prieska in die weste tot Elliot in die ooste.
OVK het oor die afgelope paar jaar op verskeie maniere uitgebrei. Die maatskappy het onder meer ’n nuwe graaninnemingspunt en koringmeule in gebruik geneem en talle nuwe handelstakke is geopen. OVK het deesdae 52 handelstakke.
OVK wil nie net ’n alles-in-eenlandboubesigheid wees nie, maar wil ook deur middel van werkskepping ’n verskil op die platteland maak. Die maatskappy streef na welvaartskepping en volhoubaarheid vir ál sy landbouprodusente – alles om die boer in staat te stel om dit wat hulle goed doen, naamlik om voedsel vir Suid-Afrika te produseer, nog beter te kan doen.
LEWENDE HAWE EN VESEL
Die verkryging van CMW was gedoen om dienslewering aan sy kliëntebasis uit te brei, én sy geo- grafiese voetspoor te vergroot.
Met ’n landwye afdeling vir vesel en lewende hawe, bied OVK ’n omvattende diens aan produsente in die ontvang, hantering en bemarking van wol en sybokhaar. Bemarkers van lewende hawe behartig ook landwyd suksesvolle produksie- en stoetveeveilings. Skeerdienste met ’n unieke mobiele skeerkarretjie is baie gewild onder kliënte.
GRAAN EN LOGISTIEK
OVK Graan is een van die maatskappy se boustene. Die dienste is allesomvattend, waaronder waardevolle ondersteuning ten opsigte van graanbemarking. Só word produsente gehelp om die praktiese wêreld van ’n boerdery tot hul voordeel in rand en sent om te skakel. OVK doen ook namens sy produsente Safex-verhandeling van mielies, koring, sojabone en sonneblomme.
OVK Logistiek het ten doel om produkte, soos graan en kunsmis, vinniger en teen ’n beter tarief by hul bestemmings af te lewer. Die dienste sluit in die oplaai en aflewer van produkte op die plaas, asook plaaslike en langafstandvervoer.
Danksy persoonlike diens en goed opgeleide personeel, voeg die maatskappy waarde toe tot
sy kliënte se behoeftes, van die plaasopstal tot by die leweringspunt. Die uitgebreide dienste wat die maatskappy in die plattelandse gemeenskappe reg oor sy bedieningsgebied lewer, bevestig ook OVK se liefde vir die landbou.
NAVRAE: Tel. 051 923 4598; e-pos: klantediens@ovk.co.za; webwerf: www.ovk.co.za