Dié week in die landbou
KOM HIER NOG REËN?
Milde buie reën, wat op sommige plekke reënmeters tot bo die 100 mm merk gevul het, het middel Februarie oor groot dele van die binneland en die Karoo geval, veral in die omgewing van Beaufort-Wes en Richmond. Dié bergskilpad is tydens ’n reënbui afgeneem op die R63 tussen Murraysburg en Graaff-Reinet. Die bergskilpad lê sy eiers in die grond, en wanneer die grond verhard, soos tydens droogtetye, moet die klein skilpadjies wat uitbroei eers wag tot dit reën en die grond sag word, voor hulle hulself kan uitgrawe. In die tien dae voor druktyd (21 Februarie) is 15 mm by Rietbron gemeet, 52 mm by Graaff-Reinet en 22 mm by Richmond.
KLIMAATVRIENDELIK
Suid-Afrikaners moet klimaatsverandering ernstiger begin opneem, het pres. Cyril Ramaphosa tydens sy repliek in die debat oor sy staatsrede gesê. Suid-Afrika is die volgende koördineerder van die komitee vir Afrika-hoofde en -regerings oor klimaatsverandering. Hy sê as Suid-Afrika werklik die belange van armes en kwesbares voorop stel, moet daar met groter dringendheid opgetree word teen die gevolge van klimaatsveran- dering, en meer gedoen word om dit te voorkom. “Landelike armes word die meeste geraak deur droogtes wat meer gereeld voorkom en langer aanhou.” Lees meer by bit.ly/2GHQ3UO
NUWE VOERWET KOM
’n Nuwe wetsontwerp oor dierevoer en troeteldierkos is vir kommentaar in die Staatskoerant van 15 Februarie afgekondig. Mnr. Senzeni Zokwana, Minister van Landbou, Bosbou en Visserye, het in Januarie gesê sy de- partement wil talle stukke sleutelwetgewing moderniseer. Die wet sit prosesse uiteen vir die regulering van voer en voerbestanddele, die lisensiëring van geriewe wat voer vervaardig, en die aanstel van ’n registrateur om die wet in werking te stel. Belanghebbendes kan tot 16 April kommentaar lewer op die wetsontwerp.
QUANTUM DUIK
’n Styging in die prys van grondstowwe vir voer en ’n daling in die verkoopprys van eiers vergeleke met verlede jaar, het Quantum se verdienste vir die eerste vier maande van die 2019-boekjaar aansienlik geknou. Die maatskappy waarsku in ’n kennisgewing op die JSE-nuusdiens dat dit ’n beduidende invloed op sy halfjaarresultate tot 31 Maart sal hê. Quantum wys daarop dat sy verdienste die vorige jaar uitsonderlik hoog was danksy lae voerkoste en hoër eierpryse. Verdienste in die maatskappy se Afrika-bedrywighede het ook gedaal weens die verswakking van die Zambiese kwacha.
KORING HELP
Pioneer Foods se omset in die vier maande tot 31 Januarie het met 7,8% gestyg, as die verkryging van Wellington’s en Lizi’s buite rekening gelaat word. Die maatskappy sê in ’n aankondiging op die JSE-nuusdiens dat die groei hoofsaaklik te danke is aan prysinflasie by brood, koringmeel, rys en uitvoervrugte, asook volumegroei in drankies, brood, rys en ontbytgraan in Brittanje. Die maatskappy sê verbruikersvraag bly onder druk, en hy verwag nie dat dié situasie in die afsienbare toekoms sal verbeter nie.
SUIKERTAKS BYT
Meer as 1 000 werkgeleenthede kan op die spel wees as gevolg van herstrukturering by Coca-Cola Beverages SA, berig BusinessTimes. In ’n kennisgewing aan die Food and Allied Workers Union skryf die maatskappy hy het voor die instel van die suikerbelasting volumegroei van 4% voorspel, maar weens die belasting en “ekonomiese teenwinde” was verkoopvolumes laer, en sal dit na verwagting eers in 2021 herstel. Teen einde 2018 het dié belasting volgens die Tesourie nagenoeg R2,3 miljard ingevorder. Volgens Coca-Cola het hy ná die instel van die heffing sy pryse verhoog, in teenstelling met sy mededingers, wat die maatskappy markaandeel gekos het. Die maatskappy het 7 100 mense in diens.
TRONK TOE?
Meer as ’n jaar ná die skuldigbevinding van mnre. Phil Mohlahlane (62), voormalige uitvoerende hoof van die Land Bank, Rubben Mohlaloga (45)
(foto), ’n voormalige voorsitter van die parlementêre portefeuljekomitee vir landbou en tans voorsitter van die Onafhanklike Kommunikasie-owerheid (Okosa), en mnr. Dinga Nkhwashu (40), ’n prokureur, op klagte wat verband hou met R6 miljoen wat in 2008 by dié bank verduister is, is die drie tot altesaam 51 jaar tronkstraf gevonnis. Mohlahlane moet vir sewe jaar sit, Mohlaloga effektief 20 en Nkhwashu 24 jaar. Hulle het appèl aangeteken. Lees meer by bit.ly/2U5XE3H