Staatsgrond vir landbou ál vinniger uitgewys
DIE pas waarteen staatsgrond vir landbouproduksie en behuising uitgewys word, is aan die verbeter, sê mnr. Jeremy Cronin, Adjunkminister van Openbare Werke.
Cronin se departement is deur die Departemente van Landelike Ontwikkeling en Grondhervorming en van Menslike Nedersettings gevra om ongebruikte staatsgrond beskikbaar te stel vir landbouproduksie en behuising.
Die Regering het bykans 30 000 stukke grond wat meestal deur staatsdepartemente gebruik word, asook meer as 93 000 geboue geïdentifiseer.
Pres. Cyril Ramaphosa het in sy staatsrede gesê dat staats- grond vir herverdeling beskikbaar gestel sal word as deel van pogings om grondhervorming te versnel. Die grond daarvoor is reeds geïdentifiseer. Volgens mnr. Thulas Nxesi, Minister van Openbare Werke, is 3 659 eiendomme uitgewys wat vir boerdery aangewend kan word. Die Departemente van Landbou, Bosbou en Visserye en van Landelike Ontwikkeling en Grondhervorming is gelas om lewensvatbaarheidstudies te doen rakende die geskiktheid van die betrokke grond vir landbouproduksie. Grond vir behuising is ook reeds geïdentifiseer. Cronin, wat grootliks gemoeid is met ontDie eieningswetgewing, benadruk dat grond vir ontwikkeling slegs aan munisipaliteite toegestaan word wat behoorlike ontwikkelingsplanne voorlê. Sodoende wil die staat verseker dat die grond gebruik word vir die doel waarvoor dit toegestaan is.
RESTITUSIEGROND
Altesaam 539 stukke staatsgrond is vir restitusie-eise geoormerk.
Me. Sasa Subban, adjunkdirekteur-generaal van die Departement van Openbare Werke, het aan die Parlement se portefeuljekomitee vir openbare werke gesê dat ooreenkomste vir die oordrag van 261 stukke grond, wat 141 606 ha beslaan, reeds geteken is. Die departement is die voog van hierdie grond.
Altesaam 43 van die stukke grond is haar departement se besit, 55 val onder die Departement van Landelike Ontwikkeling en Grondhervorming, 101 val onder provinsiale departemente van openbare werke, 43 is in private besit, een is onder die Departement van Water en Sanitasie se jurisdiksie, en 18 stukke grond moet nog nagegaan word.
Subban sê die departement beoog om 98 eise teen einde Maart af te handel. ’n Verdere 100 eise sal teen 31 Maart 2020 afgehandel wees, met nog 100 eise wat teen 31 Maart 2021 afgehandel behoort te wees.
Altesaam 278 eise op die 539 stukke staatsgrond – wat 267 636 ha beslaan – moet nog deur die verifikasieproses gaan en goedgekeur word. Van dié grond is 158 stukke by die Departement van Openbare Werke, 43 by die Departement van Landelike Ontwikkeling en Grondhervorming, 18 by provinsiale departemente van openbare werke, tien is in private besit, en 49 moet nog nagegaan word.
‘Altesaam 278 eise op die 539 stukke staatsgrond moet nog deur die verifikasieproses gaan en goedgekeur word.’