WOL | Pryse stabiel ondanks China-verbod

Wolpryse het op die jongste veilings stabiel gebly, ondanks die verbod wat China verlede maand op Suid-Afrikaanse wol ingestel het. “In hierdie stadium verloop die veilings goed. Ons is ingenome dat wol steeds verkoop, en kan tans nie kla nie,” sê mnr. Isak Staats, hoofbestuurder van wol en bokhaar by BKB.

Twee veilings is voorverlede week aangebied: die geskeduleerde een asook die veiling wat vir 20 Februarie beplan was en toe uitgestel is. Op die eerste veiling was die sluitingsprys R218,17/kg, wat 0,3% laer was as op die vorige veiling. Op die 27 Februarie-veiling was die sluitingsprys R217,60/kg, met die Cape Wools Merino-aanduider wat met ’n verdere 0,3% gedaal het. Op verlede week se veiling was die sluitingsprys R221,78/kg (skoon), en die Cape Wools Merino-aanduider 1,9% hoër.

Volgens Staats koop die kopers wol aan om dit op te berg. Dit word egter teen ’n groot risiko gedoen.

Mnr. Deon Saayman, bestuurder by Cape Wools, sê die regering se handelskomitee lewer ’n groot bydrae om die Chinese wolverbod te probeer oplos. “Ons moet nou net tyd toelaat vir al die nodige prosedures om plaas te vind. Dit is moeilik om ’n tydraamwerk daaraan te koppel.”

Sterker wol het swakker vertoon weens ’n tekort aan belangstelling uit China. Weens die Chinese verbod was daar ook ’n skerp daling in die prys van korter wol.