DRYWENDE SONPANEELSTELSEL EERSTE IN AFRIKA
’n Vrugteplaas net buite Franschhoek het met die onlangse installering van ’n drywende sonpaneelstelsel ’n doeltreffende bron van hernubare krag gekry – die eerste in sy soort in Afrika.
Marlenique, ’n vrugteplaas en troubestemming wat deur Boplaas 1743 besit en bestuur word, sal die stelsel, wat op 1 Maart amptelik bekend gestel is, saam met panele op die plaas se grond gebruik om in 90% van die kragbehoeftes van die intensiewe koelkamer, besproeiing en troubestemming se geriewe te voorsien.
Die volgende fase van dié projek behels die installering van batterye, wat die plaas selfvoorsienend sal maak in al sy kragbehoeftes.
New Southern Energy het die stelsel op die plaas se dam geïnstalleer. Dit sal nie net help om hernubare krag te lewer nie, maar ook verdamping verminder. Dié drywende stelsel is nie net die eerste op
die vasteland nie, maar teen 60 kWp is dit ook die grootste sonpaneelstelsel in Afrika.
Me. Beverley Schäfer, die Wes-Kaapse minister van landbou, ekonomiese ontwikkeling en toerisme, het met die bekendstelling gesê die projek is ’n poging om die bestuur van water en krag, belangrike kwessies in die landbousektor en ekonomie, aan te pak.
“Die stelsel verminder die plaas se afhanklikheid van die kragnetwerk en lewer skoon, bekostigbare krag, terwyl dit ook verdamping verminder en water bespaar. Dit sal daartoe lei dat die besigheid op lang termyn geld bespaar en ’n onderneming daarstel wat nie net volhoubaar vir die omgewing is nie, maar ook finansieel volhoubaar is.”
Schäfer het gesê besighede in die WesKaap word al geruime tyd aangemoedig om sonkrag as ’n alternatiewe kragbron te benut. Volgens haar word 112 MW tans deur middel van sonkrag opgewek, wat ’n aansienlike toename is van die sowat 18 MW sonkrag wat in 2015 opgewek is. Dit verminder nie net die las op die kragnetwerk nie, maar diversifiseer die provinsie se kragbronne.
Mnr. Carl van der Merwe, finansiële direkteur van Boplaas 1743, het gesê die stelsel sal die onderneming se koolstofspoor halveer. Stygende kragpryse en onsekerheid rondom Eskom was die redes waarom besluit is om die stelsel te installeer. “Van al die besighede in ons portefeulje gebruik Marlenique die meeste krag. Ons hoop om deur sonkrag ons hele portefeulje in die nabye toekoms 100% omgewingsvriendelik te maak.”
Mnr. David Masureik, uitvoerende hoof van New Southern Energy, het Boplaas 1743 se installering van die innoverende stelsel geprys. Hy het ook die regering vir sy ondersteuning bedank. “Sonder die nasionale en provinsiale regering se ondersteuning vir bedrywe om meer volhoubaar en onafhanklik van die kragnetwerk te funksioneer, sou ons besigheid nie bestaan het nie. Ons voel geeerd om deel van die gunstige verandering in die openbare en private sektor te wees.”