Dekgewasse maklik geplant op bankies
Met hierdie bankieplanter is die voordele van herlewingslandbou vir vrugteboere meer bereikbaar.
Danksy ’n dekgewasplanter wat wydsbeen oor die werkry in vrugteboorde en wingerde loop en slegs op die bankie dekgewasse plant – iets wat tot nou nie moontlik was nie – sal herlewingslandboubeginsels makliker binne die bereik van vrugteboere wees.
Die saadbakke van die planter, wat deur Piket Implemente op Piketberg gemaak word, is in die middel van die staalraam van die planter aangebring sodat dit maklik deur die boomrye kan beweeg.
Die planteenhede met skyfplanters is al oor jare in die Swartland in strawwe toestande getoets en sal dekgewasse maklik en doeltreffend in die klam grond van boorde en wingerde se bankies kan plant.
Hierdie planter is lig en klein. Dit is dus ideaal vir vrugteboere wat jaloers is op die sukses wat met herlewingslandboubeginsels in die graanbedryf behaal word.
Herlewingslandboukundiges in die graanen veebedryf, soos die Amerikaners mnre.
■ ’n Vernuwende planter stel vrugte- en wingerdboere in staat om dekgewasse op die bankie te plant.
■ Herlewingslandbouvoordele wat voorheen nie vir vrugteboere beskore was nie, is nou binne bereik.
Gabe Brown en Scott Gonnerman, bespaar tot 100% aan insetkoste danksy die voordele van gesonde ekostelsels wat deur herlewingslandboubeginsels gevestig word.
Die gebruik van dekgewasse om grondstruktuur te bou, voedingstowwe in die grond te bou, waterindringing en -houvermoë te verbeter en om onkruid te onderdruk, is van die belangrikste beginsels van herlewingslandbou.
Die gebruik van dekgewasse wat voedingstowwe, soos stikstof en koolstof, in die grond terugplaas, is doeltreffend by kontantgewasse omdat die kontantgewas regstreeks gesaai word waar die dekgewasse gestaan het. Die naaste wat vrugteboere aan ’n soortgelyke oplossing kon kom, is om dekgewasse in die werkry te plant.
VERBETER GROND NABY WORTELS
Vir mnr. Stoney Steenkamp, grondgesondheidspesialis, was dit bloot nie goed genoeg nie. Hy wou bekostigbare bedekking op die bankies ter wille van vogbewaring verseker, want water is ’n skaars hulpbron by Vredendal, waar hy werk.
“Op verlede jaar se herlewingslandboukonferensie van Landbouweekblad het ek besef ons moet die grond verbeter waar ons huidige gewas se wortels is. By wisselbougewasse, soos mielies, verbeter dekgewasse die
produksie van mielies wat in dieselfde grond geplant word. Die voordeel word nie verkry by wingerd en vrugte wat drupbesproei word nie omdat die dekgewasse in die middel van die werkry staan. Die wortels van drupbesproeide wingerd en vrugte is hoofsaaklik onder die drupperlyn. Ons moet dáár die dekgewas vestig om bedekking te kry en die grond te verbeter,” het hy gesê.
Steenkamp is ná die konferensie na Piket Implemente op Piketberg. Hulle het ’n prototipe gebou waarvan die twee planteenhede 2 m tot 3 m uitmekaar is, na gelang van die rywydte in die wingerd.
ONKRUID GOED ONDERDRUK
Die eerste proewe was verlede jaar in wingerd by Koekenaap en Vredendal. “Ons het ’n dekgewasmengsel van korog, hawer, radyse, witmosterd en wieke gesaai wat ongeveer R400 per hektaar gekos het. Omdat die eerste reën eers in Junie geval het, het ons eers teen 7 Junie die dekgewasse geplant. Die resultate was goed, maar die ideaal sal wees om April of Mei te plant ter wille van beter onkruidonderdrukking en meer bogrondse materiaal om doeltreffende bedekking te verseker.”
Omdat hulle laat gesaai het, het die onkruid vastrapplek gekry. Veral waar ver van die drupper gesaai is en die besproeiing nie doeltreffend was nie, het die onkruid ingekom. Waar die dekgewasse deurentyd goed gegroei het en naby genoeg aan mekaar geplant is, is die onkruid goed onderdruk.
“Die dekgewasse is op die meeste persele in September of Oktober doodgespuit. Dit het as ’n uitstekende grondbedekking gedien. Plek-plek het ons nie die dekgewasse doodgespuit nie, en dit was duidelik dat die dekgewasse met die wingerd om water en voedingstowwe meeding.
Dit is dus duidelik dat die dekgewasse doodgemaak moet word voor die wingerd of vrugteboom in die lente sterk begin groei. Dit is nie ekstra onkoste nie, aangesien ’n onkruidbespuiting in dié tyd gedoen word,” sê Steenkamp.
Die prototipe is herontwerp om pleks van ’n enkelry twee rye dekgewasse weerskante van die drupper te plant. Die planteenhede word hidroulies geskuif.
Die prys sal later bepaal word. Die planter sal vanjaar verder geëvalueer word om te sien waar dit verbeter kan word. NAVRAE: Mnr. Stoney Steenkamp, 083 659 5716.