Paneel moet besin oor kosbare trofeewild
’N HOËVLAKPANEEL sal aangestel word om beleid, wetgewing en praktyke te hersien rakende die teel, jag, handel in en hantering van olifante, leeus, luiperds en renosters.
Verlede jaar het die departement van omgewingsake ’n seminaar aangebied waar insette verkry is oor Suid-Afrika se praktyke rakende sogenoemde geblikte leeus nadat internasionale bewaringsorganisasies hom voor stok gekry het daaroor. Dit het die vraag laat ontstaan of die praktyke die land se goeie naam rakende bewaringsaksies skade berokken.
Op 7 Junie 2018 het die jaar
likse uitvoerkwota vir leeubene vanaf 800 volledige skelette in die vorige jaar tot 1 500 volledige skelette gestyg. Die departement het destyds aangevoer die verhoging is gedoen na aanleiding van nuwe navorsingsbewyse rakende die handel in leeubene in die land. Einde verlede jaar het me. Nomvula Mokonyane, minister van omgewingsake, egter weer die kwota verlaag tot 800 skelette.
BREËR BESPREKING
Haar voorganger, me. Edna Molewa, wat die hersieningsproses vir die geblikte leeubedryf begin het, het toe gesê as beleidsveranderinge oorweeg word, sal ’n breër bespreking met die verskillende belanghebbendes moet geskied.
Daar word met sowat 7 000 leeus in aanhouding geteel. Daar is ’n siening dat hierdie praktyk tot stroping lei, maar dit moet nog bewys word.
Molewa het benadruk dat ’n goed deurdagte besluit rakende ’n verbod op die teel van leeus in aanhouding geneem moet word,
want duisende leeus sal sonder versorging gelaat word.
PANEEL
Benoemings word ingewag vir kenners om in die paneel te dien. Die departement van omgewingsake sê hy is al geruime tyd besig met verskeie emosionele en ingewikkelde bewarings- en volhoubaarheidskwessies, veral rakende sleutelspesies. Dit sluit in die debat oor die doodmaak van olifante, opgegaarde ivoor, handel in renosterhoring en die kwessie van handel in leeubene.
Die paneel sal benewens die hersiening van beleid en wetgewing ook voorstelle van die ondersoekkomitee rakende die wenslikheid van wettige handel in renosterhoring moet oorweeg, asook voorstelle aan die konvensie oor handel in bedreigde spesies (Cites) oor handelsbeperkings.
Benoemings vir die paneel kan aan kmahamba@environment. gov.za gestuur word. Die sluitingsdatum is Woensdag 27 Maart.