Onsekerheid oor grond strem steeds vertroue
LANDBOUSAKELUI het in die eerste kwartaal van vanjaar effens meer vertroue gehad as in die vorige kwartaal, maar in die algemeen is sakevertroue nog laag.
Die landbousakekamer Agbiz en die nywerheidsontwikkelingskorporasie (IDC) se sakevertroue-indeks was in die eerste kwartaal 4 punte hoër as in die laaste kwartaal van verlede jaar.
Op 46 was dit egter steeds onder die neutrale vlak van 50, wat daarop dui dat landbou-ondernemings steeds pessimisties is oor saketoestande in Suid-Afrika, sê mnr. Wandile Sihlobo (foto), hoofekonoom van Agbiz.
Die meeste respondente wat aan die kwartaallikse opname deelgeneem het, se bykomende kommentaar het, soos vorige kere, oor grondhervorming gegaan. Sihlobo sê hoewel die landbou beleggings in roerende bates, soos landboutoerusting, gehad het, is die uitkoms van die grondhervormingsprosesse belangrik om vaste beleggings te lok.
OMSET
Landbousakelui se vertroue rakende omset het wel goed gestyg – met 13 punte tot 61. Sihlobo sê dit was danksy groter optimisme in die subsektore tuinbou, lewende hawe, landbouchemikalieë en wyn.
Verwant daaraan was daar ook ’n styging van 19 punte, tot 56, in die subsektor waar vertroue in uitvoervolume gemeet word. Die sitrus- en wynbedryf verwag goeie uitvoergeleenthede danksy goeie oeste. In die lewendehawe-subsektor het vertroue ondanks die uitbreking van bek-enklouseer gestyg. Sihlobo skryf dit daaraan toe dat die departement van landbou, bosbou en visserye in gesprek is met uitvoerbestemmings in Afrika en die Midde-Ooste om die tydelike verbod op Suid-Afrikaanse beesvleis op te hef.
In teenstelling met die subsektore waar vertroue verbeter het, het vertroue in algemene landboutoestande met 8 punte tot net 32 gedaal weens die ondergemiddelde reënval begin vanjaar, veral in die sentrale en westelike dele van die land.
Sakelui se vertroue in ekonomiese toestande het met 3 punte gestyg, maar staan nou op slegs 21, wat ver benede die gemiddelde op lang termyn is.